जुम्ला—कर्णाली प्रदेशमा ३५ प्रतिशत गर्भवती महिला घरमै सुत्केरी हुने गरेको पाइएको छ । सामाजिक विकास मन्त्रालय कर्णाली प्रदेशको तथ्यांकअनुसार ६५ प्रतिशत गर्भवती महिला मात्रै स्वास्थ्य संस्थामा सुत्केरी हुन जाने गरेका छन् ।
३५ प्रतिशत महिला घरमै सुत्केरी हुने गरेकाले आमा र बच्चाको मृत्यु हुनेलगायतका स्वास्थ्य जोखिम बढेका छन् । घरमै सुत्केरी हुने दरलाई शून्यमा झार्न अभियान थालिएको सामाजिक विकासमन्त्री घनश्याम भण्डारीले बताए ।
मन्त्री भण्डारीले आफूले जिम्मेवारी सम्हालेको एक वर्षको अवधिमा गरेका प्रगति ‘जिम्मेवारी, चुनौती र प्रतिबद्धताको एक वर्ष’ नाम पुस्तकमार्फत यस्तो जानकारी दिएका हुन् ।
उनले घरमै शून्य सुत्केरी हुने अभियानका लागि १० वटै जिल्लामा ४५ लाख ५० हजार रुपैयाँका दरले बजेट बिनियोजन गरिएको बताए । ‘घरमै सुत्केरी हुनेको संख्या अहिले पनि कर्णालीमा उत्तिकै छ । त्यसलाई शून्य बनाउनका लागि हामीले बजेट विनियोजन गरेर अभियान नै चलाएका हौं,’ उनले भने, ‘कर्णालीको वार्षिक मातृ मृत्युदर १ सय ७२ छ । त्यसलाई यो अभियानले कम गर्नेछ ।’ अस्पतालमा नवजात शिशुको विशेष स्याहारका लागि एसआईसीयु सेवा सञ्चालन गरिएको मन्त्री भण्डारीले बताए ।
भण्डारीले नागरिक स्वास्थ्य परीक्षण कार्यक्रम सञ्चालन गरी प्रदेशभर २२ हजार ७ सय ५१ जनाको स्वास्थ्य परीक्षण गरी ४ हजार ७ सय ५८ जनामा उच्च रक्तचाप, मधुमेह, मिर्गौलाजस्ता दीर्घरोगको पहिचान भएको छ ।
सामाजिक विकास मन्त्रालयले एक वर्षको अवधिमा कडा रोगको ‘मेजर अपरेसन’ गरेका १ सय ३१ जना बिरामीलाई प्रतिव्यक्ति १ लाख रुपैयाँसम्मको उपचार सहायता प्रदान गरेको छ । बालविवाह अन्त्यका लागि प्रादेशिक रणनीति मस्यौदा तयार भएको, बालबालिका हराएमा खोज्नका लागि बालबालिका खोज तलास केन्द्र सञ्चालन गरिएको लगायतका कामहरु गरिएको मन्त्रालयले जनाएको छ ।
