ललितपुर—हरिसिद्धीस्थि नेपाल क्यान्सर अस्पताल एण्ड रिसर्च सेन्टरमा दीप प्रज्वलन कार्यक्रम सम्पन्न भएको छ । बुधबार विश्व क्यान्सर दिवसको अवसर पारेर अस्पतालले दीप प्रज्वलनलगायतका विविध कार्यक्रम गरेको हो ।
कार्यक्रमलाई सम्बोधन गर्दै क्यान्सर रोग विशेषज्ञ समेत रहेका अस्पतालका कार्यकारी डा. सुदीप श्रेष्ठले ४ फेब्रुअरीलाई विश्व क्यान्सर दिवसको रुपमा मात्र नभएर हरेक दिन मनमा राख्नुपर्ने बताए । ‘क्यान्सर जोसुकैलाई पनि हुन सक्छ, त्यसका विरुद्ध हामी सबै एकजुट भएर लड्नुपर्छ,’ उनले भने ।
अस्पतालका मेडिकल निर्देशक डा. विजेशराज घिमिरेले वर्षमा संसारमा दुई करोडलाई क्यान्सर हुने गरेको बताए । ‘विश्वमा वर्षेनी २ करोडलाई क्यान्सर हुन्छ,’ उनले भने, ‘जसमध्ये १ करोडको क्यान्सरबाट मृत्यु हुने गरेको छ ।’ अझै यो संख्या बढ्न सक्ने बताउँदैं डा. घिमिरेले उपचार गर्ने विशेषज्ञ जनशक्ति, उपचार पद्धति र प्रविधीमा पनि विकास भइरहेको बताए ।
जसका कारण अब क्यान्सरसँग डराउनुपर्ने अवस्था नरहेको डा. घिमिरे भनाइ थियो । ‘अब क्यान्सरसँग डराउने होइन्, लड्नुपर्छ,’ उनले भने, ‘तर, हामीले सचेतना जगाएर समयमै परीक्षण गर्नुपर्ने कुरा सबैलाई बुझाउनुपर्छ ।’ उनले नेपालमा पनि क्यान्सरको उपचारका लागि राम्रो अस्पतालहरु विकास भइसकेको बताए ।
अस्पतालका अर्का चिकित्सक डा. गुसुपनिख प्रसिकोले क्यान्सरको स्वरुप फरक भौगोलिक अवस्था, फरक वातावरण र फरक परिवेश तथा फरक जीवनशैलीअनुसार भिन्न रहेको धारणा व्यक्त गरे । तर, प्रिभेन्स गर्न सकेमा क्यान्सर रोग निको पार्न सकिने उनले जानकारी दिए ।
कार्यक्रममा डा. कपेन्द्रशेखर अमात्य, डा. हरिप्रसाद ढकाल, अस्पतालकी निर्देशक डा. स्वरुपा श्रेष्ठलगायतको उपस्थिती रहेको थियो । उक्त अवसरमा फोटो बुथ, क्यान्डल लाइट, हस्ताक्षर, स्वास्थ्य परीक्षण, बेलुन उडाउनेलगायतका कार्यक्रमहरु आयोजना गरिएको थियो ।
