वीरेन्द्रनगर– सल्यानमा ५२ जनाले हराउँदै गएको दृष्टि पुनः प्राप्त गरेका छन् । दुर्गम क्षेत्रका नागरिकलाई लक्षित गर्दै कालीमाटी गाउँपालिकामा सञ्चालन गरेको निःशुल्क आँखा शिविरबाट उनीहरूले फेरि उज्यालो देख्ने अवसर पाएका हुन् ।
शिविरमा ३७२ जनाको आँखा परीक्षण गरिएकोमा ५२ जनामा मोतिबिन्दु पहिचान भई निःशुल्क शल्यक्रिया गरिएको कालीमाटी गाउँपालिकाका स्वास्थ्य शाखा प्रमुख गोरखबहादुर थापाले बताए ।
शिविरमा २४५ पुरुष र १२७ महिलाको आँखा जाँच गरिएको थियो । जसमध्ये शल्यक्रिया गरिएका बिरामीमध्ये २३ जना पुरुष र २९ जना महिला रहेका छन् ।
कालीमाटी गाउँपालिकाको समन्वयमा नेपाल नेत्रज्योति संघको आँखा स्वास्थ्य कार्यक्रमअन्तर्गत राप्ती आँखा अस्पतालको प्राविधिक सहयोगमा स्वास्थ्य चौकी कालीमाटी, रामपुरमा शिविर सञ्चालन गरिएको हो ।
स्थानीयस्तरमै विशेषज्ञ सेवा पाउँदा स्थानीयवासी खुसी भएका छन् । आर्थिक अभाव र दूरीका कारण अस्पताल पुग्न नसक्ने धेरै बिरामीलाई यस शिविरले राहत दिएको छ ।
