जुम्ला—रुकुम पश्चिमस्थित जिल्ला अस्पताल भवन निर्माणका लागि दुई पटक म्याद थप हुँदा पनि पूरा हुन सकेको छैन । निर्माणको करिब अन्तिम चरणमा रहेको अस्पताल पूरा गरेर हस्तान्तरण गर्न अझै म्याद थप गर्नुपर्ने देखिएको छ ।
वि.सं. २०४५ सालमा निर्माण भएको १५ शय्याको जिल्ला अस्पताल ३७ वर्षसम्म पनि उही संरचना र पूर्वाधारमा सञ्चालन भइरहेको अस्पताल विकास समितिका अध्यक्ष टेकबहादुर कुसारीले बताए । उनका अनुसार अस्पतालको क्षमता स्तरोन्नती र निर्माणाधीन भवन यथाशक्य निर्माण सम्पन्नका लागि विभिन्न निकायमा धाउँदा पनि समस्या समाधान हुन सकेको छैन ।
वि.सं. २०७८ सालदेखि सुरु भएको अस्पताल भवन निर्माणमा ढिलाइ हुँदा सेवा प्रवाहमा समेत सहजता आउन सकेको छैन । भौतिक पूर्वाधार र जनशक्ति अभावमा रहेको जिल्ला अस्पतालमा बिरामीको चाप भने हरेक वर्ष बढिरहेको छ ।
अस्पतालका अनुसार सम्झौता भएको तीन वर्षभित्र निर्माण सम्पन्न हुने गरी ३१ असार २०७८ मा खानी थोदुङ मिसन जेभी निर्माण कम्पनीले भवन निर्माणको लागि सम्झौता भएको थियो ।
३१ असार २०८१ भित्र निर्माण सम्पन्न हुने गरी २३ करोड १५ लाख पाँच हजार २९१ रुपैयाँमा भवन निर्माणको सम्झौता भएको थियो । तर, अझैसम्म पनि भवन पूरा भएर हस्तान्तरण हुन सकेको छैन । यसबीच दुई पटक म्याद थप भइसकेको छ ।
पछिल्लो समय २८ कात्तिक २०८२ सम्म म्याद थप भएको थियो । त्यसयता म्याद थपका लागि जिल्ला अस्पतालले सघन सहरी विकास कार्यालय जुम्लालाई पत्र भने पठाएको छ तर म्याद थपको पत्र आएको छैन ।
जिल्ला अस्पतालका लेखापाल रामबहादुर केसीका अनुसार हालसम्म अस्पताल भवन निर्माणको ९७ प्रतिशत प्राविधिक र ९५ प्रतिशत वित्तीय प्रगति भएको देखिन्छ । निर्माणको अन्तिम चरणमा रहेको भवन हस्तान्तरणका लागि म्याद थपको औपचारिक पत्रसँगै विद्युत जडान, फल्स र एङ्गल मिलानको काम मात्र बाँकी रहेको देखिन्छ । विद्युत लाइन जडानमा हुने थप खर्चसमेत व्यवस्थापन हुन सकेको छैन ।
अस्पतालका अनुसार लामो समयदेखि यहाँ खानेपानीको समेत समस्या भइरहेको छ । स्थानीयले आफूले उपभोग गरिरहेको पानी अस्पताललाई दिएर सहयोग गरिरहेका छन् । यसैगरी अस्पतालबाट सृजित फोहोरको उचित व्यवस्थापन, घेराबार, कर्मचारीको आवाससमेत समस्या भइरहेको छ ।
वि.सं. २०४५ सालमै निर्माण भएको पोस्टमार्टम भवनसमेत जीर्ण अवस्थामा छ । जिल्लामा शवगृह नहुँदा पोस्टमार्टम भवनमै शव राख्नुपर्ने र कहिलेकाहीँ एकभन्दा बढी शव हुँदा व्यवस्थापन तथा सुरक्षामा कठिनाइ हुने गरेको छ ।
