जुम्ला—रसुवाको भोटेकोशीमा आएको बाढीमा परेर बेपत्ता भएका पातारासी गाउँपालिकाका नागरिकको डिएनए परीक्षणका लागि आफन्तको नमुना संकलन गरिएको छ । १० भदौंमा रसुवा भोटेकोशी बाढीमा बेपत्ता नागरिकको डिएनए परीक्षणका लागि आफन्तहरुको रगतको नमुना संकलन गरिएको हो ।
मंगरबार पातारासी गाउँपालिकामा ३२ जनाको रगतको नमुना संकलन गरिएको छ । बुधबार गुठीचौर गाउँपालिकामा डिएनए परीक्षणका लागि नमुना रगत संकलन गर्न कर्णाली स्वास्थ्य विज्ञान प्रतिष्ठान र जनस्वास्थ्य कार्यालय जुम्लाको स्वास्थ्यकर्मीको टोली खटिएको छ । गुठीचौर गाउँपालिकामा ९ जनाको डिएनए नमुना रगत संकलन गर्ने तयारी गरिएको छ ।
पातारासी गाउँपालिकाको लाम्री, तिर्खु, माथिल्लो लोर्पा, तल्लोलोर्पा, बाता र जप्न गाउँमा गरेर ४९ जना व्यक्तिलाई बाढीले बेपत्ता बनाएको छ । रसुवाको भोटेकोशी बाढीले बेपत्ता बनाएको तीन हप्तासम्म पनि कोही पनि सम्पर्कमा आउन नसकेकोले जिल्ला विपद् व्यवस्थापन समितिको निर्णय अनुसार डिएनएको लागि रगतको नमुना संकलन गर्न थालिएको हो ।
प्रमुख जिल्ला अधिकारी तेजप्रकाश प्रसाईका अनुसार रसुवा बाढीले सबैभन्दा बढी प्रभावित भएका व्यक्ति पातारासी गाउँपालिकाका छन् । उनले भने, ‘लामो समयसम्म सम्पर्कमा नआएपछि डिएनए परीक्षणका नमुना संकलन थालिएको हो ।’
पातारासीमा ४९ जना बाढीमा हराएको तथ्यांक भएपनि ३२ जना पीडित परिवारको डिएनए परीक्षणका लागि नमुना संकलन भएको छ ।कतिपयले डिएनए परीक्षणका लागि संकलन गरिएको नमुना रगत कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा राखिएको जनस्वास्थ्य कार्यालय जुम्लाका प्रमुख किरण शर्माले बताए ।
