विराटनगर—पूर्वाञ्चल विश्वविद्यालय स्कुल अफ मेडिसिनले विश्व वातावरण दिवसको अवसर पारेर एक नौलो र प्रशंसनीय अभियानको सुरुवात गरेको छ । विश्वविद्यालयले ‘एक विद्यार्थी, एक बिरुवा’ नाम दिएर सुरु गरेको अभियानअन्तर्गत एमबीबीएस प्रथम ब्याचका विद्यार्थीहरूले वातावरण संरक्षणका लागि विशेष प्रतिबद्धता जनाएका छन् ।
अभियानको सबैभन्दा रोचक र विशिष्ट पक्ष भनेको विद्यार्थी र प्रकृतिबीचको भावनात्मक सम्बन्ध हो । क्याम्पस परिसरमा बिरुवा रोपेका प्रत्येक विद्यार्थीले आफ्नो साढे पाँच वर्षको अध्ययन अवधिभर सोही बिरुवाको रेखदेख र हेरचाह गर्नेछन् । जब उनीहरू डाक्टर बनेर व्यवसायिक जीवनमा प्रवेश गर्नेछन्, त्यतिबेला आफूले हुर्काएको रुखमा आफ्नो नामको ‘ट्याग’ राखेर बिदा हुनेछन् । यसले विद्यार्थीहरूमा जिम्मेवारीबोध र प्रकृतिसँगको सामीप्यता बढाउने विश्वास विश्वविद्यालयले लिएको छ ।
वृक्षारोपण कार्यक्रममा विभिन्न औषधिजन्य, फलफूल र छहारी दिने बिरुवाहरू रोपिएका छन् । मोरङ जिल्ला वन कार्यालयले उपलब्ध गराएका जामुन, तेजपात, शिरीष, हर्रो र छहारी रुखलगायतका बिरुवाहरू विद्यार्थीहरूले उत्साहका साथ रोपेका थिए ।
पूर्वाञ्चल विश्वविद्यालय चिकित्सा संकायका डीन डा. श्यामकुमार मल्लिक र स्कुल अफ मेडिसिनका नवनियुक्त निर्देशक डा. प्रकाश राईले बिरुवा रोपेर अभियानमा हौसला बढाएका थिए । कार्यक्रममा कलेजका प्राध्यापक, प्रशासनिक कर्मचारी र विद्यार्थीहरूको उपस्थिति रहेको थियो।
उपप्राध्यापक डा. बालकृष्ण साहका अनुसार यो अभियानले क्याम्पसलाई हराभरा बनाउनुका साथै भविष्यका चिकित्सकहरूलाई वातावरणीय स्वास्थ्यप्रति पनि सचेत गराउने लक्ष्य राखेको छ।
