एनएमएका नवनिर्वाचित अध्यक्ष डा. लोचन भन्छन्, ‘सिपीडी संघमै फिर्ता ल्याउँछु’

काठमाडौं—नेपाल चिकित्सक संघ (एनएमए) का नवनिर्वाचित अध्यक्ष डा. लोचन कार्कीले कन्ट्युनियस प्राक्टिस डेभलपमेन्ट (सिपीडी) कार्यक्रम नेपाल मेडिकल काउन्सिलबाट फिर्ता ल्याउने प्रतिवद्धता व्यक्त गरेका छन् । मंगलबार अध्यक्ष निर्वाचित घोषणापछि उनले संघले सुरु गरेको कार्यक्रम हाल काउन्सिलमा पुगेको भन्दै अब संघमै फिर्ता ल्याउने बताए ।

उनले सबै चिकित्सकहरुको भावना समेटेर अघि बढ्ने प्रतिवद्धता समेत जनाए । चिकित्सकहरुमा कुनै जात वा विभाजन हुन नहुने भन्दै कार्कीले सबै चिकित्सक समान भएको धारणा राखे ।

अध्यक्ष कार्कीले चिकित्सकको सुरक्षाको विषय आफ्नो मुख्य विषय भएको पनि बताए । ‘चिकित्सकहरुले स्वास्थ्य उपचारका क्रममा आफूलाई असुरक्षित महसुस गरिरहेका छन्,’ डा. कार्कीले भने, ‘स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐनमा ‘जेल विद आउट बेल’को व्यवस्था अनिवार्य लागु गर्नेछौं ।’