जेष्ठ नागरिकको उपचार गर्न आश्रममा अक्षय कोष खडा

विराटनगर—विराटनगर– ८ मधुमाराकी शारदा भण्डारीले आफ्नो जन्मदिनको अवसर पारेर यहाँ रहेको विराटेश्वर वृद्धाश्रममा रहेका जेष्ठ नागरिकहरूको उपचारका लागि अक्षय कोष खडा गरेकी छन् । उनले आफ्नो ४५ औं जन्मदिनको अवसरमा बिहीबार ५० हजार १ सय ५ रूपैयाँको अक्षय कोष खडा गरेकी हुन् ।

वृद्धाहरू बिरामी भएको बेला उपचार र औषधीका लागि आफ्नो जन्मदिनको अवसर पारेर अक्षय कोषको स्थापना गरिएको उनले बताइन् । जन्मदिनमा मानिसहरूले तामझाम पार्टी गर्ने प्रचलनलाई हटाउँदै शारदाले जन्मदिनमा गरिने फजुल खर्च वृद्धाश्रममा दिएको बताइन् । आश्रममा एक कार्यक्रम गरी अक्षय कोषको रकम विराटेश्वर वृद्धाश्रमका अध्यक्ष जगतप्रसाद अर्याललाई भण्डारी र उनका श्रीमान एन्जन कार्कीले संयुक्त रूपमा हस्तान्तरण गरेका थिए ।

वृद्धाहरूको औषधी उपचारका लागि स्थापना गरिएको अक्षय कोषको रकम आगामी दिनमा थप वृद्धि गर्दै लैजाने शारदाका श्रीमान एन्जलले बताए । २ वर्षदेखि जम्मा गरिएको पैसा शारदाले स्वर्गीय सासु तुलसादेवी र ससुरा वीरबहादुर कार्कीको नाममा अक्षय कोष स्थापना गरिएको बताइन् । यस वृद्धाश्रममा ६१ जना जेष्ठ नागरिक रहेका छन् ।