कर्णालीबाट पठाईएका सबै नमूना परीक्षणमा कोरोना नभएको पुष्टि

कर्णाली – कोभिड संक्रमण भएको आशंकामा हालसम्म कर्णालीबाट पठाईएका सबै नमूना परीक्षणमा कोरोना नभएको पुष्टि भएको छ । अहिलेसम्म १७ जनाको नमूना पठाईएको थियो ।

पठाईएका सबै नमूना परीक्षणमा नेगेटिभ देखिएको छ । विभिन्न देशहरुबाट आएकाको नमूना परिक्षण गरी काठमाडौं पठाइएको थियो । स्वास्थ्य सेवा निर्देशनालय सुर्खेतका अनुसार अहिलेसम्म परिक्षणका लागि पठाइएका नमुनामा कोरोनाको संक्रमण देखिएको छैन।कर्णाली प्रदेशबाट १७ जनाको स्वाव शुक्रराज ट्रपिकल तथा सरुवा रोग अस्पताल काठमाडौंमा पठाइएको थियो । पठाएका सबैमा कोरोनाको संक्रमण नभएको पुष्टि भएको छ।

मंगलबार कर्णालीका विभिन्न जिल्लाबाट कोरोनाको परिक्षणका लागि ११ जनाको नमुना नेपालगञ्ज हुदै केन्द्रिय प्रयोगशाला पठाइएको छ ।त्यस्तै, अहिलेसम्म प्रदेशभर दुइ सय ८२ जना क्वारेन्टाइन्मा रहेको प्रदेश स्वास्थ्य सेवा निर्देशनालयका भेक्टर कन्ट्रोल अधिकृत श्याम आचार्यले जानकारी दिए ।

कर्णाली प्रदेशमा हालसम्म झण्डै तीन सय २९ वटा आइसोलेसन वेड तयार भएको छ । अहिलेसम्म सबैभन्दा बढी कर्णाली स्वास्थ्य विज्ञान प्रतिष्ठान जुम्लामा एक सय २० आइसोलेसन वेड तयारी अवस्थामा रहेको बताईएको छ ।