वीरेन्द्रनगर—कर्णाली प्रदेशका सामाजिक मन्त्री खड्कप्रसाद पोखरेलले सुदूरपश्चिम प्रदेशबाट आएको मेडिकल टोलीलाई सुर्खेतबाट नै फर्काएका छन् । आइतबार भूकम्प प्रभावित क्षेत्र जाजरकोट र रुकुम पश्चिमका लागि आएको सुदूरपश्चिमका चिकित्सकको टोलीलाई सुर्खेतबाट नै फर्काएका हुन् ।
भूकम्प प्रभावित क्षेत्रमा घाइते भएकाहरुको उपचारका लागि सुदूरपश्चिम प्रदेश सरकारले पठाएको विशेषज्ञ चिकित्सकसहितको टोलीलाई कर्णाली प्रदेश सरकारका सामाजिक विकास मन्त्री पोखरेलले सुर्खेतबाट नै फर्काएका हुन् ।
धनगढीस्थित सेती प्रादेशिक अस्पतालका हाडजोर्नी रोग विशेषज्ञ डा. शिवराज पनेरुको नेतृत्वमा चिकित्सक डा. गणेश फुलारा, स्वास्थ्य निर्देशनालयका विपद् सम्पर्क व्यक्ति हेमराज जोशी र स्वास्थ्य कार्यालय कैलालीका मीनबहादुर धामीसहित चार जना स्वास्थ्यकर्मीको टोली भूकम्प प्रभावित क्षेत्रमा जानका लागि सुर्खेत पुगेको थियो ।
सुर्खेतमा सामाजिक विकास मन्त्री पोखरेलले आवश्यक नभएको भन्दै सुदूरपश्चिम नै फर्काएको सामाजिक विकास मन्त्रालय स्रोत जानकारी दियो । फर्किने भएपछि चिकित्सकको टोलीले सुदूरपश्चिम प्रदेश सरकारले पठाएको करिब चार लाख रुपैयाँ बराबरको औषधी मन्त्री पोखरेललाई हस्तान्तरण गरेको थियो ।
त्यो औषधि लिएर लोकप्रियताका लागि पोखरेलले सोमबार भूकम्प प्रभावित क्षेत्र जाजरकोटको नलगाड नगरपालिका र रुकुमपश्चिमको आठबिसकोट नगरपालिकालाई हस्तान्तरण गरेको मन्त्रालय स्रोत जानकारी दियो । ‘मन्त्रीज्यूले लोकप्रियताका लागि औषधी सुदूरपश्चिम सरकार दिएको लिएर जानुभयो,’ स्रोतले भन्यो, ‘आवश्यक चिकित्सक टोलीलाई फिर्ता गरिदिनुभयो । यो राम्रो काम भएन् । सुदूरपश्चिम सरकारले दिएको औषधी आफैले दिए जस्तो गर्नुभयो ।’
कर्मचारीसहित भूकम्प प्रभावित क्षेत्रमा पुगेमा मन्त्री पोखरेलले नगरपालिकालाई सामाजिक विकास मन्त्रालयले नै दिएको भरपाई बनाउन लगाएको ती नगरपालिकाले जनाएका छन् ।
