कार्यलय सहयोगीले टाउको दुखेका बिरामीलाई आइरन चक्की दिएको भन्दैं स्वास्थ्य केन्द्रमा स्थानीयले लगाए ताला

वीरेन्द्रनगर—कालिकोट जिल्लाको सदरमुकाममा रहेको खाँडाचक्र नगरपालिका–३ को आधारभूत स्वास्थ्य केन्द्रका कार्यलय सहयोगीले टाउको दुखेको बिरामीलाई आइरन चक्की दिएको आरोप स्थानीयवासीले लगाएका छन् । सोमबार खोकी लागेर टाउको दुखेका बिरामी औषधि लिन जाँदा कार्यालय सहयोगीले आइरन चक्की वितरण गरेको भन्दैं स्थानीयले केन्द्रमा ताला लगाइदिएका छन् ।

आधारभूत स्वास्थ्य केन्द्रका कर्मचारी करिब दुई हप्तादेखि केन्द्रमा नहुँदा स्वास्थ्यकर्मीबिहीन छ । स्थानीयहरुले वडाका बिरामीलाई पटक—पटक थर्काउने धम्काउने जस्ता क्रियाकलाप कर्मचारीबाट भएको भन्दै अर्को आरोप पनि लगाएका छन् ।

यसबाहेक कार्यालयमा समयमा केन्द्रमा नआउने, सरकारले निःशुल्क उपलब्ध गराएका औषधि सेवाग्राहीलाई उपलब्ध नगराएको आरोप स्थानीयको छ । यस्ता गतिविधिका कारण नागरिकको जीवनमा खेलवाड गरेको गुनासो पनि स्थानीयको छ ।