वीरेन्द्रनगर—कर्णालीका एक सय ३२ औषधि पसलको दर्ता रद्द भएको छ । मंगलबार औषधि व्यवस्था विभागले कर्णालीका १० जिल्लाका एक सय ३२ औषधि पसलको दर्ता रद्ध गरेको हो ।
विभागले देशभरका पाँच हजार तीन सय दुई औषधि पसलहरूको दर्ता रद्ध गर्दा कर्णालीका एक सय ३२ दर्ता खारेज गरेको छ ।
औषधि ऐन, २०३५ को दफा ११ मा भएको संशोधित व्यवस्थाअनुसार तोकिएको अवधिभित्र नवीकरण नगरिएका औषधि पसलको दर्ता प्रमाणपत्र स्वतः रद्द भएको औषधि व्यवस्था विभागले जनाएको छ ।
विभागका अनुसार दर्ता खारेज हुनेमा दैलेखका १९, सल्यानका १८, जाजरकोटका १२, जुम्लाका १२, कालिकोटका सात, सुर्खेतका ४८, मुगुका छ, डोल्पाका चार, हुम्लाका तीन र रुकुमपश्चिमका तीन वटा औषधि पसल रहेका छन् ।
