बुटवल –भैरहवा स्थित युनिभर्सल कलेज अफ मेडिकल साइन्सेज (युसिएमएस) मा चिकित्सक माथि अज्ञात समुहबाट कार्यस्थलमै भएको आक्रमणको चौतर्फी विरोध भएको छ । सोमवार बिहान अस्पतालका आवासीय चिकित्सक अर्चन घिमिरेलाई करिव १० जनाको समुहमा आएका अज्ञात व्यक्तिहरुले आक्रमण गरेका हुन् ।
घिमिरेलाई आक्रमण गर्ने क्रममा छुट्याउन खोज्दा अस्पतालका सुरक्षा प्रमुख श्याम केसी पनि घाइते भएका छन् । घाइते दुवैको उपचार अस्पतालमै भैरहेको छ । उनीहरुले अस्पताल परिसरमा भेटिएका चिकित्सकहरुलाई कुटपिट गर्दै हिडेको मेडिकल कलेजका जनसम्पर्क अधिकृत सुशील गुरुङ्गले बताए । त्यो समुहले कलेज अगाडी भेटिएका करिब १४ जना चिकित्सकहरु माथि आक्रण गरेको बताइएको छ ।
घिमिरेका अनुसार अस्पतालमा शुक्रवार राति ब्रेन ह्यामरेज भएर उपचार गर्न आएकी नवलपरासी बर्दघाटकी ५० वर्षिया यमकुमारी राना बुढामगरको मृत्युको बिषयलाई लिएर विवाद उत्पन्न हुँदा उक्त घटना भएको हो । बुढामगरलाई वान्ता आउने, टाउको दुख्ने र बर्वराउन थालेपछि उपचारका लागि मेडिकल कलेजको न्युरो वार्डमा भर्ना गरिएको थियो ।
उपचारकै क्रममा सिटी स्क्यान गर्दा रगत जमेको देखिएको उपचारमा संलग्न चिकित्सकले जनाएका छन् । उनको अवस्था गम्भीर बन्दै गएपछि आइसियुमा राखेर थप उपचारकै क्रममा उनको मृत्यु भएको हो ।
चिकित्सकका अनुसार अन्तिमसम्म उनलाई बचाउने कोशिस गर्दा पनि बचाउन सकिएन । यसमा आफूहरुको कुनै दोष नरहेको चिकित्सकको भनाइ छ । तर मृतकका आफन्त यसमा चिकित्सकहरुको लापरवाही रहेको दाबी गर्छन् ।
बुढामगरको मृत्यु भएपछि उनको परिवारले शव उठाउने तयारी गरिरहेको बेला अज्ञात व्यक्तिहरु जवरजस्ती आइसियुमा प्रवेश गरी चिकित्सक घिमिरेलाई पिट्दै बाहिर निकालेका हुन् । घिमिरेले उक्त बिरामीको उपचार आफुले गर्ने नभई वरिष्ठ न्युरोसर्जन डा राजकुमार केसी र न्युरोसर्जन डा जयदेव चन्दले गर्ने भएकोले आफु त्यहाँ आवासीय चिकित्सकको रुपमा बिरामीलाई हेरेको बताए । घटना पछि पिडीत पक्षले शब बुझेर लगेका थिए ।
अस्पतालका चिकित्सकमाथि हातपात भएको भन्दै अस्पतालको ओपीडी सेवा डाक्टरहरूले बन्द गराएका छन् । ओपीडी सेवा बन्द गर्दा उपचार सेवा प्रभावित भएको छ । डाक्टरहरूले सुरक्षा र हातपात गर्ने बिरामीका आफन्तमाथि कारबाहीको माग गरेर पेन डाउन गरेको अस्पताल प्रशासन प्रमुख तेज के.सी.ले बताए ।
नपाल चिकित्सक संघ लुम्बिनी शाखाका महासचिव डा सन्तोष पोखरेलको नेतृत्वमा चिकित्सकहरुको टोली जिल्ला प्रशासन कार्यालय पुगी घटनामा संलग्नलाई पक्राउ गरि कार्वाहीको माग गरेको छ । पोख्रेल नेतृत्वमा पुगेको टोलीले स्थानीय प्रशासनको ध्यानाकर्षण गराएको हो । संघले घटनाप्रति गम्भीर भएको जनाउँदै दोषी उपर कारवाहीको माग गरेको छ । प्रजिअ संगको छलफल पछि जारी विज्ञप्तिमा दोषी पत्तालगाउन ४८ घण्टाको चेतावानी दिइएको छ । ४८ घण्टा भित्र दोसीलाइ कार्वाही नगरेमा प्रदेश अन्र्तगतका सवै स्वास्थ्य संस्थामा आन्दोलन गरीने उनले बताए ।