काठमाडौं—नेपाल स्वास्थ्यकर्मी तथा कर्मचारी युनियनले विश्वमा महामारीका रुपमा फैलिरहेको कोरोना भाइरस (कोभिड—१९) विरुद्ध लडन स्वास्थ्यकर्मीहरु अग्रमोर्चामा रहने भएकाले उनीहरुका लागि अत्यावश्यक सुरक्षा उपकरणको सहज व्यवस्था मिलाउन माग गरेको छ ।
बिहीबार युनियनले एक प्रेस विज्ञप्ती जारी गर्दै नेपाल सरकार, स्वास्थ्य सेवा प्रदायक संस्थाहरुसँग यस्तो माग गरेको हो ।
युनियनका अध्यक्ष चन्द्र थापाले जारी गरेको उक्त विज्ञप्तिमा यो महामारीलाई नियन्त्रण गर्न सक्षम, प्रतिवद्ध र विश्वासिला स्वास्थ्यकर्मी तथा कर्मचारी भएतापनि सुरक्षा उपकरण तथा सुरक्षा तालिम बिना काम गर्न बाध्य पारिएकोले परिणाम कहालीलाग्दो बन्दै गरेको जनाइएको छ ।
साथै, महामारीसँग लडन नेपाली स्वास्थ्यकर्मी तथा कर्मचारीहरु अग्रपंक्ति रहने पनि विश्वास लिएको छ । युनियले सबै नेपाली नागरिकलाई भयरहित रुपमा सुरक्षित रहन तथा संक्रमण हुन सक्ने स्थलमा अत्यावश्यक अवस्थाबाहेक नजान समेत अनुरोध गरेको छ ।
