‘फेसवुक पेजमा रिच बढाउन काेराेनाले मान्छे मरेकाे भ्रम फैलाए’

काठमाडौं-कोरोना भाइरस (कोभिड-१९) बारे भ्रमणपूर्ण अडियो क्लिप बनाएर भ्रम फैलाउने रामेछापका विवेक थापा मगरले आफ्नो फेसबुक पेजमा रिच बढाउन त्यस्तो म्यासेज बनाएको बयान प्रहरीलाई दिएका छन् ।

शनिबार दिउँसो उनलाई केन्द्रीय साइबर ब्यूरोले पक्राउ गरेपछि उनले त्यस्तो बयान दिएका हुन् ।

शुक्रवार बेलुकादेखि राजधानीको एक अस्पतालमा ६ जना कोरोना संक्रमित भएको त्यहीका चिकित्सकले बताएको हवाला दिदैं उनले सामाजिक संजालमा भ्वाइस म्यासेज रेकर्ड गरेर भ्रम फैलाएका थिए ।

सामाजिक संजालमा उनले बनाएको भ्रमपूर्ण अडियो क्लिप भाइरल बनेर फैलिएपछि नेपाल प्रहरीले खोजी गरी  पक्राउ गरेको थियो ।

रामेछाप ठाडादेवी घर भएका २० वर्षीय थापा मगर भक्तपुर सिपाडोल बस्दै आएको प्रहरीले जनाएको छ । उनीमाथि प्रहरीले थप अनुसन्धान जारी राखेको छ ।