स्वास्थ्यकर्मीको लागि ‘पीपीई’ को व्यवस्था हुने मन्त्रालयको दावी

काठमाडौँ-स्वास्थ्य तथा जनसंख्या मन्त्रालयका सचिव यादव प्रसाद कोइरालाले स्वास्थ्यकर्मीका लागि आवश्यक ‘पीपीई’, मास्क औषधिहरुको व्यवस्था गर्ने दावी गरेका छन् । बिहीबार ‘कोभिड-१९’ सम्बन्धि मन्त्रालयको नियमित मिडिया व्रिफिङ्गमा सचिव कोइरालाले उक्त जानकारी दिएका हुन् ।

कोभिड-१९ को उपचारको निम्ति तयारी अवस्थामा राखिएको २५ वटा हब अस्पताललाई ‘फिभर क्लिनिक’ संचालन गर्न १०-१० लाख रुपैयाँ दिइएको उनले जनाए । उक्त रकममार्फत आवश्यक औषधि तथा उपकरण खरीद गरी सेवा सञ्चालन गरिने उनको भनाइ छ ।

यसको साथै उनले नेपालमा अहिलेसम्म ७ सयभन्दा बढी व्यक्तिको कोरोना परिक्षण भएकोमा ३ जना व्यक्तिको मात्रै रिपोर्ट पोजेटिभ आएको जानकारी दिए ।

उनले कोरोना जोखिम क्षेत्रबाट आएका व्यक्तिलाई क्वारेन्टाइनमा बसेर संक्रमण फैलन नदिन आग्रह गरेका छन्। विश्व स्वास्थ्य संगठनद्वारा बनाइएको कोरोना भाइरसविरुद्धको नियमलाई पालना गर्न सम्पूर्ण नेपालीलाई मन्त्रालयले आग्रह गरेको छ ।