काठमाडौं–चीनबाट सहयोग स्वरुप आएका अत्यावश्यक स्वास्थ्य सामाग्री नेपाल सरकारलाई हस्तान्तरण गरेको छ । आइतबार स्वास्थ्य तथा जनसंख्या मन्त्रालयमा नेपालका लागि चिनियाँ राजदूत होउ यान्छीले स्वास्थ्यमन्त्री भानुभक्त ढकाललाई उक्त सामाग्री हस्तान्तरण गरेकी हुन् ।
सिचुवान प्रान्त, चिनियाँ राजदूतावास, अलिबाबा फाउन्डेसन, ज्याक्मा फाउन्डेसन, चाइना सीएएमसी इन्जिनियरिङ, सिचुवान होङसी ग्रुप, होङसी सिमेन्ट प्रा.लि.लगायतका सहयोग स्वरुप विभिन्न अत्यावश्यक स्वास्थ्य सामाग्री उपलब्ध गराएका थिए । जसमा एन९५ मास्क, डिसेबल सर्जिकल मास्क, पोटेक्टीभ गगल्स, नन कन्ट्याक्ट इन्फारेड थर्मोमिटर, प्रोटेक्टीभ क्लोथ, पोर्टेबल भेन्टिलेटर, पिसीआर टेष्ट किट, डिस्पोजेबल ग्ल्बसलगायतका सामाग्रीहरु रहेका थिए ।
विभिन्न निकायलेहरुले सहयोग स्वरुप नेपाललाई दिएका स्वास्थ्य सामाग्री हस्तान्तरण गर्ने क्रममा नेपालका लागि चिनियाँ राजदूत यान्छीले नेपाललाई कोभिड–१९ विरुद्धको लडाइमा चिनियाँ सहयोग जारी रहने बताइन् । ‘हाम्रो सहयोग यतिमा मात्र सिमित छैन्, अझै सहयोग गर्नेछौं,’ उनले भनिन्, ‘हामीले कोभिड –१९ विरुद्धको लडाइ जित्ने चरणमा छौं । केन्द्रीय सरकारले कोरोना प्रभावित विभिन्न देशमा सहयोग गर्ने योजना बनाएको छ ।’
सहयोग सामाग्री बुझ्दै स्वास्थ्य मन्त्री ढकालले चीन सरकार उपलब्ध गराएको सहयोगका लागि धन्यवाद व्यक्त गरे ।
