कोभिड-१९ रोकथाम तथा उपचारमा ५० हजार स्वयंमसेविका परिचालन गर्ने

काठमाडौं-सरकारले कोभिड-१९ रोकथाम तथा उपचारमा देशभरका ५० हजार बढी स्वास्थ्य स्वयंसेविका परिचालन गर्ने निर्णय गरेको छ ।

उपप्रधान तथा रक्षामन्त्री ईश्वर पोखरेल संयोजक रहेको कोभिड-१९ नियन्त्रण तथा रोकथाम उच्चस्तरीय समितिको आइतबार बसेको बैठकले यस्तो निर्णय गरेको हो ।

समितिको बैठकले गाउँ गाउँमा रहेका महिला स्वयंमसेविकाहरुलाई विमा तथा विशेष भत्ता उपलब्ध गराएर परिचालन गर्ने निर्णय गरेको प्रधानमन्त्री कार्यलयका सचिव नारायण बिडारीले जानकारी दिए ।

यस्तै, सरकारले क्वारेन्टाइनमा रहेकाहरुको स्वास्थ्य परिक्षणपछि मात्रै घर पठाउने निर्णय समेत गरेको छ । यसअघि १४ दिनसम्म क्वारेन्टाइनमा राखेपछि लक्षण नदेखिएको अवस्थामा त्यतिकै घर पठाउने गरेको थियो ।

सरकारले यसअघि नै कोभिड-१९ को उपचारमा खटिने स्वास्थ्यकर्मीहरुको २५ लाख बिमा गर्ने निर्णय गरेको थियो । त्यसलाई पनि अब थप प्रष्ट पारिने भएको छ ।