नेपालको दोस्रो कोभिड—१९ संक्रमितलाई आज डिस्चार्ज गर्ने तयारी

काठमाडौं—नेपालको दोस्रो कोभिड—१९ संक्रमित १९ वर्षीया नेपाली युवतीको रिपोर्ट नेगेटिभ आएको छ । रिपोर्ट नेगेटिभ आएपछि शनिबार टेकु ट्रपिकल तथा सरुवा रोग अस्पतालले उनलाई डिस्चार्ज दिने तयारी गरेको हो ।

फ्रान्सबाट ४ चैतमा काठमाडौं आइपुगेकी ती युवतीमा १० चैतमा कोभिड—१९ पोजेटिभ देखिएको थियो । त्यसपछि उनको टेकुस्थित शुक्रराज ट्रपिकल तथा सरुवा रोग अस्पतालको आइसोलेसनमा उपचार भैरहेको थियो ।

उनको पछिल्लो स्वाब रिपोर्ट नेगेटिभ आएको टेकु अस्पताल स्रोतले जानकारी दियो । ‘उहाँको नेगेटिभ रिपोर्ट आएको छ,’ अस्पताल स्रोतले भन्यो, ‘फ्लोअपका लागि हामी काउन्सिलिङ गरिरहेका छौं ।’ उनलाई अस्पतालले सम्भवतः आजै डिस्चार्ज दिने तयारी गरेको छ ।

उनी कोभिड—१९ पोजेटिभ पुष्टी भएको २९ दिनपछि डिस्चार्ज हुन लागेकी हुन् । यसअघि नेपालमा पहिलो कोभिड—१९ चीनको बुहानबाट फर्किएका पुरुष निको भएर घर फर्किसकेका छन् ।