कोभिड-१९ नियन्त्रणबारे स्वास्थ्य मन्त्रालयका अधिकारी र मुस्लिम आयोगका पदाधिकारीबीच छलफल

काठमाडौं-स्वास्थ्य तथा जनसंख्या मन्त्रालयले ’कोभिड-१९’ नियन्त्रणबारे मुस्लिम आयोगका अध्यक्षलगायतका पदाधिकारी र मुस्लिम अगुवासँग छलफल गरेको छ । भारत तथा अन्य देशबाट आएका जमातीमा कोभिड-१९ संक्रमण भेटिन थालेपछि मंगलबार मन्त्रालयले मुस्लिम आयोगका पदाधिकारी र मुस्लिम अगुवाहरुसँग छलफल गरेको हो ।

मन्त्रालयले जमातीका हिडेकाहरुको ’कन्ट्रयाक ट्रेसिंग’ सहजीकरण गरिदिन आग्रह समेत गरेको छ । जमातीमा हिडेका र मस्जिदमा रहेका जमातीहरुको पनि कन्ट्रयाक ट्रेसिंग गर्न सहयोग गर्न समेत सरकारले अनुरोध गरेको थियो ।

मुस्लिम आयोगका अध्यक्ष समिन मियाँ अन्सारीको नेतृत्वमा आएको टोलीले पनि कन्ट्रयाक ट्रेसिंगमा मद्दत गर्ने  र सबै मस्जिदमा आफूहरु पनि उपस्थित भएर सहयोग गर्ने प्रतिबद्धता जनाएको छ । ट्रेसिंग गर्दा कसैमा कोभिड १९ को लक्षण देखिएमा तत्काल उनीहरुको स्वाब लिनका लागि स्वास्थ्य मन्त्रालयका अधिकारी र जनस्वास्थ्य अधिकारी पनि मुस्लिम आयोगको टोलीसँगै जाने सहमति पनि उक्त छलफमा बनेको छ ।

स्वास्थ्य मन्त्रालयका विज्ञ सल्लाहकार डा. खेम कार्कीले कोभिड-१९ कुनै धर्म, जातिबीच विशेषमा नहुने र सबैका लागि चुनौती भएकोले आ-आफ्नो क्षेत्रबाट यसको रोकथामका लागि पहल गर्नेसमेत छलफल भएको बताए ।