पत्रकारलाई स्वास्थ्य मन्त्रालयमा प्रवेश कडाइ गरेकोमा मञ्चको आपत्ती

काठमाडौं-पत्रकारहरुलाई स्वास्थ्य तथा जनसंख्या मन्त्रालय प्रवेशमा कडाइ गरेको प्रति स्वास्थ्य पत्रकार मञ्चले विरोध जनाएको छ । मञ्च विज्ञप्ती जारी गर्दै यो कदम तत्काल सच्याउन समेत माग गरेको छ ।

विज्ञप्तीमा महामारीको बेला जोखिम उठाएर जनतालाई सही सूचना दिन सक्रिय सञ्चारकर्मीलाई मन्त्रालयले सहज ढंगले सूचना उपलव्ध गराउनुपर्नेमा उल्टै प्रवेशमा रोक लगाउनु दुखद् रहेको उल्लेख छ । मञ्चका अध्यक्ष कल्पना आचार्य र महासचिव रामप्रसाद न्यौपानेले बुधबार एक विज्ञप्ती जारी गर्दै मन्त्रालयको उक्त कदमप्रति विरोध जनाएका हुन् ।

यस्तै मञ्चले कोरोना रिपोर्टिङमा खटिएका पत्रकारहरुलाई न्युनतम स्वास्थ्य सुरक्षा सामग्री उपलव्ध गराउन सम्वन्धी सञ्चारगृहको ध्यानाकर्षण गराएको छ भने स्वयं पत्रकारले समेत सजग रहेर रिपोर्टिङमा खटिन अनुरोध गरेको छ ।

विभिन्न जिल्लामा रिपोर्टिङमा खटिएका तीन जना भन्दा बढी पत्रकारलाई कोरोना संक्रमण देखिएपछि मञ्चले आफ्ना सदस्य तथा आम पत्रकारलाई सचेत गराएको हो ।