टेकु अस्पतालमा अब कोभिड—१९ संक्रमितलाई रोबर्टबाटै खाना र औषधी

काठमाडौं—नेपाल इन्जिनियरिङ कलेज भक्तपुरका विद्यार्थीहरुले संक्रमित रोगका बिरामीहरुका लागि उपयोगी हुने रोबर्ट निर्माण गरेका छन् । उनीहरुले संक्रमित बिरामीका लागि रिमोटका माध्यमबाट खाना तथा औषधी पुर्‍याउने रोबर्ट बनाएका हुन् ।

उनीहरुले बनाएको रोबर्ट शुक्रबार परीक्षणका लागि कोभिड—१९ संक्रमितको उपचार भैरहेका शुक्रराज ट्रपिकल तथा सरुवा रोग अस्पताललाई हस्तान्तरण गरेका छन् । कलेजका अध्यक्ष समेत रहेका चाँगुनारायण नगरपालिकाका मेयर सोमप्रसाद मिश्र र कलेजका प्रिन्सिपल हरिकृष्ण श्रेष्ठले संयुक्त रुपमा अस्पतालका निर्देशक डा. सागर राजभण्डारीलाई हस्तान्तरण गरेका हुन् ।

अस्पतालमा गरिएको डोमोष्ट्रेशनमा संक्रमित बिरामीका लागि रोबर्ट प्रभावकारी हुने देखिएको अस्पतालका प्रशासकीय अधिकृत रुपनारायण खतिवडाले बताए । ‘यो हाम्रोजस्तो सरुवा रोगका बिरामी उपचार गर्ने अस्पतालका लागि प्रभावकारी हुने देखिएको छ,’ उनले भने, ‘परीक्षण सफल भएमा उहाँहरुले थप रोबर्ट बनाइदिने प्रतिवद्धता जनाउनुभएको छ ।’

भिडियो