आफुलाई शंका लागेमा शुल्क तिरेर कोरोना परीक्षण गर्न पाइने

काठमाडौं – स्वास्थ्य तथा जनसंख्या मन्त्रालयले शंका लागेमा शुल्क तिरेर जो सुकैले पनि कोरोना परीक्षण गर्न पाउने जनाएको छ । मन्त्रालयको मंगलबारको नियमित व्रिफिङमा प्रवक्ता डा. विकास देवकोटाले लक्षण नदेखिएका स्वदेशी तथा विदेशी नागरिकले तोकिएको सार्वजनिक स्वास्थ्य संस्थामा स्वेच्छाले आरडीटी र पीसीआर परीक्षण गर्न पाउने मन्त्रालयले व्यवस्था गरेको जनाएका हुन्।

उनकोअनुसार तोकिएको मापदण्ड र सूचनाको गोपनियता तथा नियमित रिपोर्टिङ गर्ने सर्त अनिवार्य पालना गर्ने गरी परीक्षण हुने र परीक्षण शुल्क संस्थाहरुले मापदण्ड अनुसार निर्धारण हुनेछ।

यसै सन्दर्भमा बोल्दै मन्त्रालयका सह-सचिव डा. गुणराज लोहनीले तोकिएका सरकारी अस्पतालबाट उक्त सेवा प्राप्त गर्न सकिने र परीक्षण शुल्कको विषयमा २ दिनभित्रै टुंगो लाग्ने बताए ।

शुल्क तिरेर नै आफ्नो परीक्षण गराउन चाहाने संख्या बढेपछि सरकारले स्वेच्छाले आरडीटी र पीसीआर परीक्षण गर्न पाउने निर्णय गरेको हो ।