काठमाडौं-बालुवाटारस्थित मारिया हस्पिटल (मारिया हेल्थ सेन्टर प्रा.लि) बिना दर्ता अवैद्य रुपमा सञ्चालन गरेको पाइएको छ । नेपाल मेडिकल काउन्सिलको टोलीले १ जेठमा गरेको अनुगमनका क्रममा उक्त हस्पिटल बिना अनुमति गैरकानुनी रुपमा सञ्चालन गरेको र विदेशी चिकित्सकहरुले अवैध रुपमा स्वास्थ्य परीक्षण गरेको पाइएको काउन्सिलका निमित्त रजिस्ट्रार डा. दिपेन्द्र पाण्डेले जानकारी दिए ।
आवश्यक अनुमति र क्लिनिकल मापदण्ड पूरा नगरी चिकित्सा अभ्यासमा संलगन तीन जना चिनियाँ नागरिक डा. सिएनलिन, डा. चेन सिएलिन र डा. लिउ जिकिनको अस्थायी दर्ता निलम्बन गर्दै उनीहरुलाई तीन दिनभित्र स्पष्टीकरण पेश गर्न काउन्सिलले निर्देशन दिएको छ ।
निमित्त रजिस्ट्रार डा. पाण्डेकाअनुसार अवैध रुपमा सञ्चालन गरिएको उक्त अस्पताललाई तत्काल सिलबन्दी गर्न र कारवाही चलाउन जिल्ला प्रशासन कार्यालय र जिल्ला प्रहरी कार्यालयलाई काउन्सिलले पत्राचारसमेत गरिसकेको छ ।
यस्तै, भिसा शर्त विपरित काम गर्ने चिनियाँ नागरिकहरुको गैर पर्यटकीय भिसा र श्रम इजाजत खारेजीका लागि स्वास्थ्य तथा खाद्य स्वच्छता मन्त्रालय विस्तृत प्रतिवेदन पठाएको पनि उनले जानकारी दिए । काउन्सिलले दर्ता नै नगरी अवैध रुपमा हस्पिटल सञ्चालन गरिएको सूचनाका आधारमा मारिया हेल्थ सेन्टरमा अनुगमन गरेको थियो ।
