काठमाडौं—नेपालमा थप १७० जनामा कोरोना भाइरस (कोभिड—१९) को संक्रमण पुष्टि भएको छ । स्वास्थ्य तथा जनसंख्या मन्त्रालयको नियमित पत्रकार सम्मेलनमा मन्त्रालयका प्रवक्ता डा. विकास देवकोटाले शुक्रबार थप १७० जनामा कोरोना संक्रमण पुष्टि भएको बताएका हुन् ।
मन्त्रालयका प्रवक्ता डा. देवकोटाकाअनुसार झापाका २८ जना, सप्तरीका ४ जना, बाराका ४, पर्साका ५ जना, सर्लाहीका ५ जना, म्याग्दीका १ जना, कपिलबस्तुका ५१ जना, बाँकेका १० जना, नवलपरासी बर्दघाटका २, रौटहटका ५६, रुपन्देहीका १ र दाङका २ जनामा थप संक्रमण पुष्टि भएको हो।
मन्त्रालयका प्रवक्ता डा. देवकोटाले मुलुकभर गरेर हाल १ हजार जना रहेको र क्वारेन्टाइनमा ९९ हजार ३ सय ३६ जना रहेको बताएका छन् । पछिल्लो समय नेपालले कोरोना परीक्षण प्रयोगशालाको संख्या र परीक्षणको दायरा बढाएसँगै कोरोना संक्रमित पुष्टि हुने संख्या पनि बढिरहेको छ ।
यससँगै नेपालमा कोरोना संक्रमितको संख्या १ हजार २ सय १२ पुगेको हो । जसमध्ये २०६ संक्रमितले कोरोना विरुद्धको लडाइ जितेका छन् । आजमात्रै १९ संक्रमित निको भएर घर फर्किएको मन्त्रालयले जनाएको छ ।
त्यस्तै, मन्त्रालयले थप एक जना संक्रमितको मृत्यु भएको जनाएको छ । गए राति अर्घाखाँची भूमिकास्थान नगरपालिका, ९ का ३५ वर्षीय पुरुषको मृत्यु भएको थियो । भारतमा काम गर्दै आएका उनी गत जेठ १० गते नेपाल प्रवेश गरेपछि जेठ १ गते उनको स्याम्पल परीक्षण गर्दा रिपोर्टमा कोरोना पोजेटिभ आएको हो ।
योसँगै कोरोनाबाट मृत्यु हुनेको संख्या ६ पुगेको छ ।