थप दुई जनाको कोरोनाबाट मृत्यु भएको पुष्टि, मृतकको संख्या १३ पुग्यो

काठमाडौं—कोरोनाबाट नेपालमा थप २ जनाको मृत्यु भएको छ । बिहीबार स्वास्थ्य तथा जनसंख्या मन्त्रालयको नियमित ब्रिफिङमा मन्त्रालयका प्रवक्ता डा. विकास देवकोटामा कैलाली र डोल्पामा मृत्यु भएका दुई जनामा कोभिड—१९ पुष्टि भएको बताए ।

डोल्पा जगदुल्लाका ५८ वर्षीया पुरुषको २१ जेठमा राति २ बजे मृत्यु भएको थियो । उनी १६ जेठमा सुर्खेतबाट डोल्पाका लागि हिडेका थिए । १८ जेठमा डोल्पा पुगेर क्वारेन्टाइनमा रहेका बेला राति उनको मृत्यु भएको थियो । उनी दम रोगका बिरामी थिए । मृत्युपछि उनको स्वाब कर्णाली स्वास्थ्य विज्ञान प्रतिष्ठानको प्रयोगशालामा गरिएको परीक्षणमा कोभिड—१० पोजेटिभ देखिएको प्रवक्ता डा. देवकोटाले बताए ।

यस्तै, २३ जेठ दिउँसो सेती प्रादेशिक अस्पतालमा मृत्यु भएकी ५५ वर्षीया महिलामा पनि कोभिड—१९ पुष्टि भएको छ । मिर्गौला रोगकी बिरामी ती महिला २१ जेठको विहान डाइलाइसिसका लागि अस्पताल पुगेकी थिइन् । उनको डाइलाइसिसकै क्रममा त्यही दिन मृत्यु भएपछि स्वाब परीक्षणका लागि सेती अस्पतालको प्रयोगशालामा पठाइएको थियो । जसको रिपोर्टमा शनिबार कोभिड—१९ पोजेटिभ देखिएको हो ।

यससँगै नेपालमा कोभिड—१९ देखिएका मृतकको संख्या १३ पुगेको छ ।