कान्तिमा ओपिडी जाँच गर्न अनलाइन टिकटिङ सेवा सुरु

काठमाडौं—कान्ति अस्पतालले अब अनलाइनबाटै ओपिडीको टिकट काटेर सेवा लिन पाउने सुविधा विस्तार गरेको छ ।

अस्पतालका निर्देशक डा. कृष्ण पौडेलका अनुसार मोबाइलमा अस्पतालको एप डाउनलोड गरेर या अस्पतालको वेवसाइटबाटै पनि ओपिडी टिकट बुक गर्न सकिन्छ ।

शुक्रबार स्वास्थ्य तथा जनसंख्या मन्त्री भानुभक्त ढकालले अनलाइन टिकटिङ सेवाको उद्घाटन गरेका हुन् ।

अस्पताल निर्देशक डा. पौडेलका अनुसार हाललाई एन्ड्रोइड मोबाइल प्रयोगकर्ताहरुले गुगल प्लेस्टोरबाट कान्ति चिल्ड्रेन्स हस्पिटल नामक एप्स डाउनलोड गरी सेवा लिन सकिन्छ भने कान्ति चिल्ड्रेन हस्पिटल डटजीओभी डटएनपीबाट पनि पैसा तिर्न सकिने व्यवस्था मिलाइएको छ ।

अस्पतालले ओपिडी टिकटको दर ५० रुपैयाँ कायम गरेको छ भने अनलाइन दर्ता शुल्क पहिलो पटकलाई थप ३० रुपैयाँ लाग्ने उल्लेख गरेको छ । अनलाइनमार्फत ओपिडी टिकट लिनेहरुले विहान ९ बजेदेखि दिउसो १ बजेसम्म पैसा तिरेको स्वीकृत गराइ सेवा लिन सकिने जानकारी दिइएको छ ।