पोखरा—नेपाली कांग्रेसले गण्डकी प्रदेश सभामा कोरोना रोकथाम, नियन्त्रण तथा उपचारलाई प्रभावकारी बनाउन संकल्प प्रस्ताव दर्ता गरेको छ । मंगलबार दर्ता भएको प्रस्तावमा प्रदेशभरि ‘एक घर, एक पिसिआर जाँच’को व्यवस्था गर्न माग गरिएको छ ।
नेपाली कांग्रेसका सांसद्हरु कुमार खड्का, मेखलाल श्रेष्ठ र सरिता गुरुङले कोरोना नियन्त्रण र उपचारको क्षेत्रमा सरकारलाई दबाब दिन संकल्प प्रस्ताव दर्ता गराएका हुन् ।
प्रदेशसभा नियमावलीको नियम ८५ को १ अनुसार संकल्प प्रस्ताव दर्ता भएको हो । कांग्रेसले विश्व स्वास्थ्य संगठन र नेपाल सरकारले तय गरेको मापदण्डअनुसारको क्वारेन्टाइनको व्यवस्था तत्काल गर्नुपर्ने, स्वास्थ्यकर्मी, भेन्टिलेटरलगायतका आवश्यक स्वास्थ्य उपकरणयुक्त आईसीयु र आइसोलेसन कक्षको व्यवस्था गर्नुपर्ने प्रस्ताव पेश भएको छ ।
आवश्यक स्वास्थ्य जनशक्ति, भेन्टिलेटर, आइसोलेसन कक्षको व्यवस्था गर्न र कोरोनाका कारण मृत्यु हुनेहरुको शव व्यवस्थापन गर्न गण्डकी प्रदेशका ११ वटै जिल्लामा स्थान तत्काल व्यवस्था गर्न सरकारलाई निर्देशन गर्न प्रस्ताव दर्ता भएको कांग्रेस संसदीय दलका प्रवक्ता प्रकाशचन्द्र दवाडीले बताए ।
प्रत्येक जिल्लामा कोरोनाबाट मृत्यु भएका व्यक्तिको शव व्यवस्थापन गर्न स्थान तोक्न प्रस्तावमा माग गरिएको छ । गण्डकी प्रदेशमा हालसम्म ४ जनाको कोरोना संक्रमणबाट मृत्यु भएकोमा ३ जनाको शव व्यवस्थापनमा तनाव उत्पन्न भएको थियो ।
गण्डकीमा कोरोना संक्रमितको संख्या १ हजार १ सय १३ पुगेको छ । तीमध्ये ३ सय १६ निको भएर घर फर्केका छन् भने ४ जनाको मृत्यु भएको छ । प्रदेश स्वास्थ्य निर्देशनालयका अनुसार ७ सय ९७ संक्रमितको आइसोलेसनमा उपचार भइरहेको छ ।
