काठमाडौं उपत्यकाको जोखिम अवलोकन गर्न एक हप्तामा ४५ हजार नमुना संकलन गरिदैं

काठमाडौं—सरकारले काठमाडाैं उपत्यकामा कोरोना संक्रमितको संख्या बढेसँगै ४५ हजार उपत्यकावासीको नमुना संकलन गर्ने भएको छ । स्वास्थ्य तथा जनसंख्या सचिव लक्षण अर्यालले एक हप्ताभित्र ४५ हजारको नमुना संकलन गर्न निर्देशन दिएका छन् ।

उनले एक हप्तामा सो संख्यामा नमुना लिएर परीक्षण गरे उपत्यकाको अवस्था एकिन गर्न सकिने बताए । ‘सचिवको निर्देशनअनुसार हामीले काम अगाडि बढाइसकेका छौं,’ इपिडिमियोलोजी तथा रोग नियन्त्रण महाशाखाका प्रमुख डा. वासुदेव पाण्डेले भने ।

तर, महाशाखाले निर्देशन दिएको दुई दिन बितिसक्दा समेत ८ सयको संख्यामा मात्रै नमुना संकलन गरेको जनाएको छ । उपत्यकामा कोरोना संक्रमण बढ्दैं गएपछि स्वास्थ्य मन्त्रालयले ४५ हजार नमुना एक हप्तामा संकलन गर्ने भएको हो ।