२०८१ असार ३०, आईतबार
Health Aawaj logo
गृहपृष्ठसमाचारएक महिना कोरोना परीक्षण गर्न पुग्ने किट मौज्दात

एक महिना कोरोना परीक्षण गर्न पुग्ने किट मौज्दात


काठमाडौं—सरकारले १५ असारदेखि दैनिक पीसीआर परीक्षणको दायरा बढाएर १० हजार पु¥याउने घोषणा गरेको थियो । घोषणा गरेको दिन हालसम्मकै सर्वाधिक ७ हजार ७ सयको परीक्षण भएको थियो । तर, त्यसयता दैनिक परीक्षणको संख्या ४ हजार वरिपरी घुमिरहेको स्वास्थ्य तथा जनसंख्या मन्त्रालयको तथ्यांकले देखाएको छ ।

स्वास्थ्य मन्त्रालयका प्रवक्ता डा. जागेश्वर गौतम नमुना नभएका कारण परीक्षण संख्या कम भएको बताउँछन् । भारतबाट आएर क्वारेन्टाइनमा बसेको संख्या ठूलो भएकाले नमुना त्यही अनुपातमा संकलन भएको थियो । तर, अहिले सो संख्या घट्दै गएकाले नमुना कम हुँदा स्वतः परिक्षण घटेको उनको भनाइ छ । सुरुका दिनका क्वारेन्टाइनमा बस्नेहरुको संख्या २ लाखको हाराहारीमा थियो । त्यस बेला नेपालका प्रयोगशालाहरुमा २० हजारसम्म नमुना थुप्रिएका थिए । अहिले क्वारेन्टाइनमा बस्नेहरुको संख्या २५ हजार कम छ ।

राष्ट्रिय जनस्वास्थ्य प्रयोगशालाका अनुसार मुलुकभरका २५ प्रयोगशालामा नमुना सकिएका छन् । सामान्य अवस्थामा पिसिआर परीक्षणको रिपोर्ट आउन २४ देखि २४ घण्टाको समय लाग्छ । हाल त्यही अनुसार नमुना खपत भइरहेको प्रयोगशालाका सूचना अधिकारी राजेश गुप्ताले बताए । प्रयोगशालाका अनुसार देशभरका प्रयोगशालामा क्षमताभन्दा बढी नमुना छैन । एकै दिनमा रिपोर्ट नआउने हुँदा प्रक्रियामा रहेका बाहेक नमुना प्रयोगशालामा छैन ।

स्वास्थ्य सेवा विभागका महानिर्देशक डा. दीपेन्द्ररमण सिंह ठूलो संख्यामा बिरामी भएका र क्वारेन्टाइनको संख्या पनि कम भएको अवस्थामा सुरुका दिनमा जस्तो अहिले व्यापक नमुना नहुने बताउँछन् । तर, सरकारले बिदेशबाट नागरिक ल्याउन थालेकाले जोखिम बढेसँगै अबका केही दिन पछि पुनः स्वाबको संख्या र परीक्षणको दायरा बढ्ने उनको तर्क छ ।

इपिडिमियोलोजी तथा रोग नियन्त्रण महाशाखाका अनुसार अब कन्ट्याक्ट ट्रेसिङको मात्रै परीक्षण गर्नुपर्नेछ । यो पनि दैनिक देशभर ५ देखि ६ हजारको संख्यामा नमुना संकलन भएका छन् । हाल जति संकलन भएका छन् त्यति नै परीक्षण भएको छ । भएका प्रयोगशालाहरुले पनि काम पाएका छैनन् । दैनिक १५ सयको संख्यामा नमुना परीक्षण गर्दैै आएको केन्द्रीय प्रयोगशालाले नमुना नभएका कारण एक हप्तादेखि ६ देखि ८ सयको संख्यामा मात्रै नमुना परीक्षण गरेको छ ।

यही अवस्थामा एक महिनालाई पुग्ने किट मौज्दात 

स्वास्थ्य सचिव लक्ष्मण अर्यालले चार महिनाका लागि पुग्ने परीक्षण किट भएको बताएका छन् । ‘मैले सबै निर्देशन दिइसकेको छु,’ उनले भने, ‘यदि टार्गेटअनुसार र समयमा काम भएन भने जिम्मेवार कर्मचारीलाई कारबाही गर्छु ।’ उनले उपत्यकाको अवस्था बुझ्न एक हप्ता भित्र कम्तिमा पनि ४५ हजार नमुना संकलन गर्न निर्देशन दिएको बताए ।

‘४५ हजारको परीक्षण गर्दा उपत्यकाको एउटा फिगर अनुमान गर्न सकिन्छ,’ उनले भने । हाल ९४ प्रतिशत संक्रमण बाहिरबाट आएकाहरु छन् । इपिडिमियोलोजी तथा रोग नियन्त्रण महाशाखाका प्रमुख डा. वासुदेव पाण्डेले उपत्यकामा धमाधम नमुना संकलनका कार्य भइरहेको बताए ।


क्याटेगोरी : समाचार



तपाईको प्रतिक्रिया दिनुहोस


ट्रेण्डिङ