काठमाडौं—शहिद धर्मभक्त राष्ट्रिय मानव अंग प्रत्यारोपण केन्द्र भक्तपुरमा कार्यरत ३५ जना स्टाफ नर्सले नियम विपरित करार सम्झौता थप गर्न दबाब दिएको पाइएको छ । विगतमा लोकसेवाको दरबन्दी नहुँदा केन्द्रले लोकसेवाबाट नआउँदासम्मका लागि भनी ३५ जना स्टाफ नर्स करारमा नियुक्त गरेको थियो ।
शहिद धर्मभक्त राष्ट्रिय प्रत्यारोपण केन्द्र भक्तपुरमा नेपाल सरकारबाट स्वीकृत नर्सको दरबन्दी ९६ जना रहेको छ । सो दरबन्दीअनुसारका कर्मचारी लोकसेवाबाट आएपछि केन्द्रले करार सम्झौता सकिएको बताएपछि नर्सहरुले विरोध गर्न थालेका छन् ।
केन्द्रका निर्देशक डा. प्रेमराज ज्ञवालीले उनीहरुको सम्झौता सकिएपनि कोभिड—१९ को समयमा निकाल्न उपयुक्त नभएको भन्दै चैत मसान्तमा तीन महिनाको करार म्याद अन्तिम पटक थपेका थिए ।
चैत मसान्तमा करार सकिए तापनि नर्सहरुलाई कोरोना रोगको समयमा ३ महिनाको लागि थपिएको करार गत असार मसान्तमा सकिएको छ । सो सम्झौतामा ३५ नर्सहरुले पनि सहमति जनाएका थिए ।
तर, पुन अहिले आएर निकाल्न नमिल्ने भन्दै विरोध गर्न थालेका छन् । स्वीकृत दरबन्दीअनुसारका ९६ जना नर्स हाल केन्द्रमा नियमित काममा छन् ।
कोरोना महामारीका बेला बिना काम बस्न नपरोस भनेर स्वास्थ्य तथा जनसंख्या मंत्रालयले १८ जना करारका नर्सहरुलाई सोही अस्पतालमा र बाँकी १७ जनालाई आफ्नै मातहतका काठमाडौंकै अन्य अस्पतालहरुमा स्थानान्तरण गरि अर्को ३ महिना करार थप गर्ने बताएको छ । तर, ती नर्सहरुले भने सबैको करार सोही अस्पतालमा निरन्तर हुनुपर्ने माग राखेर विरोध गर्न थालेपछि अस्पताल प्रशासनलाई अप्ठ्यारो अवस्था सिर्जना भएको छ ।
