काठमाडौं—नेपाली कांग्रेसका महामन्त्री डा. शशांक कोइरालाको स्वास्थ्य अवस्था गम्भीर तर स्थिर रहेको ओम अस्पतालले जनाएको छ । कोरोना भाइरस संक्रमण भएपछि कोइराला उपचारका लागि मंगलबार ओम अस्पताल भर्ना भएका थिए । उनको आईसीयुको सहायतामा चिकित्सकहरुले उपचार गरिरहेका छन् ।
सामान्य स्वास्थ्य जाँच गराउन मंगलबार ओम अस्पताल पुगेका कोइरालाको स्वास्थ्य सूचक खराब भएको देखिएपछि चिकित्सकले तत्काल भर्ना गरेका थिए ।
अस्पतालका प्रबन्ध संचालक बाबुकाजी कार्कीले डा. कोइरालाको स्वास्थ्यमा समस्या देखिएपछि आईसीयुमा राखेर उपचार सुरु गरेको बताए । ‘उहाँ मंगलबार बिहान सामान्य स्वास्थ्य जाँचका लागि अस्पताल आउनुभयो,’ कार्कीले भने, ‘हामीले सिटी स्क्यानदेखि आवश्यक पर्ने सबै जाँच ग¥यौं । तर, सिटी स्क्यानको रिपोर्टमा छातीमा समस्या देखियो । त्यसपछि तत्काल आईसीयुमा भर्ना गरेका हौं ।’
कोइरालालाई निमोनिया देखिएको छ । निमोनियासँगै छातीमा संक्रमण देखिएकाले आवश्यक औषधि चलाउन थालिएको अस्पतालले जनाएको छ । कोरोनाको उपचारमा हाल प्रयोग हुँदै आएको रेम्डेसिभिर पनि चलाएको कार्कीले बताए । तर, कोइरालाको स्वास्थ्यमा थप समस्या भने देखिएको छैन ।
‘कोइरालाको स्वास्थ्य झ्याप्पै सुधार भएको पनि छैन । थप खराब भएको पनि छैन । त्यसैले हामीले थप बिग्रन नदिन रेम्डेसिभिर पनि चलाउँन सुरु गरेका छौं,’ उनले भने । उनको उपचारमा अस्पतालका निर्देशक डा. विश्वनाथ कोइराला, डा. सुबोधसागर ढकाल, डा. प्रमेशसुन्दर श्रेष्ठलगायतको टिम संलग्न छन् ।
