सात महिनापछि सुरु भयो मृगौला प्रत्यारोपण सेवा

काठमाडौं– शहिद धर्मभक्त राष्ट्रिय मानव अंग प्रत्यारोपण केन्द्रले मृगौला प्रत्यारोपण सेवा सुरु गरेको छ । केन्द्रले सात महिनापछि मृगौला प्रत्यारोपण सेवा पुनः सुरु गरेको हो ।

२२ असोजमा रुकुम चौरजहारीका २१ वर्षीय एक युवकको मृगौला प्रत्यारोपण गरिएको केन्द्रका कार्यकारी निर्देशक डा. प्रेमराज ज्ञवालीले बताए । ती युवकलाई उनकी ५० वर्षीया आमाले मृगौला दान गरेकी थिइन् । ‘अहिले दुवैजनाको स्वास्थ्य अवस्था सामान्य रहेको छ,’ केन्द्रका निर्देशक डा. ज्ञवालीले भने, ‘प्रत्यारोपण गरिएको मृगौलाले राम्रोसँग काम गर्न थालेको छ ।’

साधारण व्यक्तिमा हुने कोरोना संक्रमण भन्दा मृगौला प्रत्यारोपण गरिएका बिरामीहरुमा हुने कोरोना संक्रमण जटिल हुने हुँदा संसारभर नै मृगौला प्रत्यारोपण शल्यक्रिया प्रभावित छ । डा. ज्ञवालीले राष्ट्रिय मानव अंग प्रत्यारोपण केन्द्र भक्तपुरमा मृगौला प्रत्यारोपण सुरु भएपछि नेपालका अन्य अस्पतालहरुमा पनि यो सेवा सुरु हुने विश्वास व्यक्त गरे ।