विपी कोइराला स्वास्थ्य विज्ञान प्रतिष्ठानमा २ जना कोरोना संक्रमितको मृत्यु

काठमाडौं—विपी कोइराला स्वास्थ्य विज्ञान प्रतिष्ठान धरानमा २ जना कोरोना संक्रमितको मृत्यु भएको छ । प्रतिष्ठानका सह—प्रवक्ता डा. आशिष श्रेष्ठकाअनुसार प्रतिष्ठानको कोभिड अस्पतालमा शुक्रबार सुनसरीका ५२ वर्षीय र ६८ वर्षीय पुरुषको मृत्यु भएको हो ।

विपी प्रतिष्ठानको अस्पतालमा भर्ना हुन आएका इटहरी—६ सुनसरीका ६८ वर्षीय पुरुष २० असोजमा कोरोना पुष्टि भएको थियो । कोरोना पुष्टि भएपछि २२ असोजमा प्रतिष्ठानको कोभिड अस्पतालमा भर्ना भएका थिए । कुनै पनि दीर्घ रोग नभएका उनको शुक्रबार राति १२ः३० मा मृत्यु भएको डा. श्रेष्ठले बताए ।

यस्तै, सुनसरीको दुहवीका ५२ वर्षीय पुरुषको पनि प्रतिष्ठानको कोभिड—१९ अस्पतालमा शुक्रबार राति २ बजे मृत्यु भएको छ । क्रोनिक डिजिज समस्या रहेका उनी १२ असोजमा कोरोना संक्रमण पुष्टि भएपछि प्रतिष्ठानको कोभिड अस्पतालमा उपचार गरिदैं आइएको थियो ।

मृतक दुवैको कोभिड—१९ शव व्यवस्थापन कार्यविधीअनुसार शव व्यवस्थापन गरिने सह—प्रवक्ता डा. श्रेष्ठले बताए ।