काठमाडौं–स्वास्थ्य तथा जनसंख्या मन्त्रालयमा शिक्षा सचिव खगराज बराललाई ल्याइएको छ । स्वास्थ्य सचिव रामप्रसाद थपलियाको भने युवा तथा खेलकूद मन्त्रालयमा सरुवा गरिएको छ ।
सोमबार बसेको मन्त्रिपरिषद्को बैठकले बराललाई स्वास्थ्य मन्त्रालयको सचिवका रूपमा सरुवा गरेको हो भने स्वास्थ्य मन्त्रालयका सचिव थपलियालाई युवा तथा खेलकूद मन्त्रालयको सचिवको जिम्मेवारी दिएको हो । स्वास्थ्य र शिक्षासंगै अन्य केही मन्त्रालयका सचिवहरु पनि हेरफेर भएको प्रधानमन्त्री निकट स्रोतले जनाएको छ ।
स्वास्थ्य मन्त्रालयमा मन्त्री सचिवको टसलका कारण दुई सचिव कार्यरत छन् । उपप्रधान, स्वास्थ्य तथा जनसंख्यामन्त्री उपेन्द्र यादवसँग सचिव डा. पुष्पा चौधरीको टसल परेपछि उनलाई प्रधानमन्त्री कार्यलयमा तानिएको थियो । यसका विरुद्ध चौधरी सर्वोच्च गएकी थिइन्, उनलाई सर्वोच्चले पुनः स्वास्थ्य मन्त्रालयमै काम गराउन सरकारलाई आदेश दिएको थियो ।
त्यसपछि स्वास्थ्य मन्त्रालयमा चौधरीको अधिकार कटौती गरि अर्काे सचिवको ब्यवस्था गरिएको थियो । सुरूमा अर्का सचिवका रुपमा केदारप्रसाद अधिकारी कार्यरत थिए, केदारप्रसाद पछि सचिव चन्द्र घिमिरे आएका थिए । घिमिरेको सरूवा भएपिछ स्वास्थ्य सचिवका रूपमा भने थपलिया आएका थिए ।
