काठमाडौं—स्वास्थ्य तथा जनसंख्या मन्त्रालयले आजदेखि कोभिड–१९ विरुद्धको खोप ‘कोभिशिल्ड’ वितरण सुरु गरेको छ । विभाग स्रोतका अनुसार पोखरा भ्याक्सिन लिएर पहिलो भ्यान हिडेको छ । पोखरा क्षेत्रीय मेडिकल स्टोरमा ११ जिल्लाका स्वास्थ्यकर्मीलाई पुग्ने खोप भण्डारण हुनेछ । त्यहाँ १७ हजार ६ सय ३० स्वास्थ्यकर्मी सुचीकृत छन् ।
शनिबार सात वटै प्रदेशमा खोप पठाउने भनेपनि स्वास्थ्य मन्त्रालयले अनुमति नदिएका कारण ढिला भएको थियो । नयाँ खोप नागरिकमा प्रयोग गर्न स्वास्थ्य मन्त्रालयले स्वीकृती दिनुपर्छ । मन्त्रालयको स्वीकृती बिना खोप प्रयोग गर्न पाइदैन ।
स्वास्थ्य सेवा विभागका अनुसार सम्भव भएसम्म सात वटै प्रदेशमा आजै खोप वितरण सकिनेछ । त्यस्तै काठमाडौंका नजिक रहेका १० जिल्लामा भने सोमबार वितरण गरिने छ । ती १० जिल्लामा केन्द्रिय खोप भण्डारण स्टोरले हेर्ने छ । प्रदेशले पठाएको सूचीका आधारमा केन्द्रले खोप पठाउनेछ ।
१० लाख अनुदानमा आएको खोप करिब ४ लाख ५० हजारलाई लगाइने छ । त्यसमध्ये २ लाख २५ हजार स्वास्थ्यकर्मी र महिला स्वयंसेविका रहेका छन् । बाँकी सफाइ कर्मचारी, एम्बुलेन्स चालक, शव व्यवस्थापनमा खटिएका कर्मचारी र केही सुरक्षाकर्मीलाई दिइने स्वास्थ्य मन्त्रलायले जनाएको छ ।
