नेपाल स्वास्थ्य ब्यवसायी परिषद्को रजिष्ट्रारमा दीपक भट्ट

काठमाडौं—नेपाल स्वास्थ्य ब्यवसायी परिषद्को निमित्त रजिष्ट्रारमा दीपक भट्ट नियुक्ति भएका छन् । आइतबार भट्ट उपप्रधान एवं स्वास्थ्य तथा जनसंख्या मन्त्रीस्तरीय निर्णयबाट निमित्त रजिष्ट्रारमा नियुक्त भएका हुन् ।

डब्लुएचओको दक्षिण एसियाली राष्ट्रहरुको स्वास्थ्य मन्त्रीस्तरीय बैठकमा दिल्ली जानुपूर्व मन्त्री उपेन्द्र यादवले उनलाई अर्को ब्यवस्था नहुन्जेलसम्मका लागि परिषद्को रजिष्ट्रारको जिम्मेवारी दिएका हुन् ।

‘अहिलेसम्म त्यहाँ धेरै समस्या छन् । त्यहाँका समस्याहरुको मुख्य कारकहरु के रहेछन्, ती पत्ता लगाएर म अगाडि बढ्छु,’ भट्टले निमित्त रजिष्ट्रार नियुक्त भएपछि हेल्थआवाजसँग भने, ‘सबैसँग सहकार्य गरेर अगाडि बढ्छु ।’

लामो समयदेखि रजिष्ट्रार नियुक्त नहुँदा परिषद्का कारकारवाहीहरु प्रभावित भएका थिए ।