कास्कीको माछापुच्छ्रे गाउँपालिकाका सबै सेवा बन्द, वडा नम्बर ४ सिल गरियो

पोखरा-कास्की जिल्लाको माछापुच्छ्रे गाउँपालिकाका सबै सेवा १ हप्ताका लागि बन्द गरिएको छ । गाउँपालिकामा कोरोना संक्रमित ह्वात्तै बढेपछि सतर्कता अपनाउँदै गाउँपालिका कार्यालय बन्द गरिएको गाउँपालिका अध्यक्ष कर्णबहादुर गुरुङले बताए ।

चैत १३ देखि १८ गतेसम्म गाउँपालिकाले दिने सबै प्रकारका सेवा बन्द हुनेछन् । गाउँपालिकाको वडा नं ४ भने सिल गरिएको माछापुच्छ्रे ४ का अध्यक्ष तथा गाउँपालिका प्रवक्ता पूर्णबहादुर शाहीले जानकारी दिए । वडाध्यक्ष शाहीकाअनुसार कार्यालयबाट सेवा प्रदान गरिँदा संक्रमणको खतरा रहेकाले सेवा बन्द गरिएको हो ।

माछापुच्छ्रे ४ लाहाचोकस्थित सभ्य समता बचत तथा सहकारीबाट अवलोकन भ्रमणमा गएका १३ जनामा कोरोना पुष्टि भएपछि वडा सिल गरिएको हो । संक्रमितका सम्पर्कमा आएकाहरुको समेत नमुना संकलन गरी जाँच गरिरहेको उनले बताए ।

बिहीबारसम्म पोखरास्थित इन्जिनियरिङ अध्ययन संस्थान पश्चिमाञ्चल क्याम्पसका ७६ जनामा कोरोना संक्रमण पुष्टि भएकोमा शुक्रबार २९ जनामा संक्रमण पुष्टि भएको गण्डकी प्रदेश स्वास्थ्य निर्देशनालयले जनाएको छ ।