विद्यार्थीलाई सिफ्टमा पढाउन सीसीएमसीको सिफारिस

काठमाडौं—नेपालमा कोभिड—१९ को संक्रमण पुनः बढेसँगै विद्यालयहरुमा सुरक्षाका मापदण्डका साथसाथै विद्यार्थीहरुलाई वैकल्पिक दिनमा बोलाएर अध्ययन/अध्यापन गराउन सिफारिस गरेको छ । कोभिड—१९ संकट व्यवस्थापन केन्द्र (सीसीएमसी)ले विद्यालय सञ्चालकहरुको संगठनहरुसँग छलफल गरी यस्तो सिफारिस गरेको हो ।

केन्द्रले निश्चित विद्यालयमा संक्रमण देखिए सो विद्यालय निश्चित समयका लागि बन्द गर्ने तर पहिलेको जस्तो सबै शैक्षिक संस्था ठप्प पार्ने योजना नरहेको स्वास्थ्य मन्त्रालयका सीसीएमसी प्रतिनिधि प्रमुख विशेषज्ञ महेन्द्रप्रसाद श्रेष्ठले जानकारी दिए ।

‘तत्काल विद्यालय बन्द गर्ने भनेको होइन् । भिडभाड कम गराउने उपाय अवलम्बन गर्न विद्यालयहरुलाई भनिएको हो,’ उनले भने, ‘सरकारलाई वैकल्पिक दिनमा पठनपाठन गर्ने निर्णय गर्नका लागि सिफारिस गरिएको हो ।’

भारतमा तीब्र रुपमा कोभिड—१९ को संक्रमण बढेसँगै नेपालमा पनि कोरोना संक्रमण उकालो लागिरहेको छ । जसका कारण सरकारले पछिल्लो समय जनस्वास्थ्यका मापदण्ड पालना गर्न जोड दिइरहेको छ ।