अमेरिकाद्वारा आफ्नो नागरिकलाई नेपाल यात्रा नगर्न आग्रह

काठमाडौँ – अमेरिकाले आफ्ना नागरिकलाई नेपालको यात्रा नगर्न आग्रह गरेको छ । अमेरिकी दुतावासले ट्राभल एडभाइजरी जारी गर्दै  आफ्ना नागरिकहरुलाई नेपाल यात्रा  नगर्न आग्रह गरेको हो ।

नेपालमा फैलिएको कोरोना महामारीको अत्याधिक संक्रमणको अवस्थालाई मध्यनजर गर्दै अमेरिकाको रोग नियन्त्रण तथा रोकथाम केन्द्र(सिडीसीले) लेभल ४ को ट्राभल हेल्थ नोटिस जारी गरी नेपाललाई उच्च जोखिम देशको सूचीमा राखेको छ ।

कोरोना रोकथामको लागि नेपालले सबै अन्तर्राष्ट्रिय  उडान बन्द गरेको अवस्थामा अमेरिकाले नेपाल सरकारसँग आफ्नो नागरिकलाई चाटर्ड गरी लैजाने प्रस्ताव गरेको उल्लेख गरेको छ। सो प्रस्ताबको स्वीकृतिको लागि प्रतिक्षामा रहेको समेत दुतावासले जनाएको छ।

यसअघि अमेरिकाले  लेभल ४ को ट्राभल हेल्थ नोटिस जारी गर्दै भारतमा रहेका आफ्नो नागरिकलाई तत्काल स्वदेश फर्कन आग्रह गरेको थियो ।