२०८१ साउन १०, बिहीबार
Health Aawaj logo
गृहपृष्ठलुम्बिनी प्रदेशलुम्बिनी प्रादेशिक अस्पतालमा विस्तारित सेवा सुरु, चाप बढी हुने क्षेत्र पहिलो प्राथमिकतामा

लुम्बिनी प्रादेशिक अस्पतालमा विस्तारित सेवा सुरु, चाप बढी हुने क्षेत्र पहिलो प्राथमिकतामा


बुटवल—लुम्बिनी प्रादेशिक अस्पताल बुटवलले विरामीका लागि दिदैँ आएका सेवाहरुमध्ये बढी चाप हुनेमा विस्तारित सेवा सुरु गरेको छ । बिरामीको चाप बढ्दै गएपछि सुविधाजन्य तरिकाले सेवा दिनका लागि अस्पतालले विस्तारित सेवा सुरु गरेको अस्पतालका मेडिकल सुपरिटेन्डेन्ट डा. इन्द्र ढकालले बताए ।

अस्पतालले अधिक चाप हुने ईईजी, सीवीसीटी तथा ईएचएस सेवा विस्तार गरेको छ । अस्पतालको नियमित पेईङ्ग वार्ड र न्युरो मेडिसिन सेवाको महत्वपुर्ण ईईजी सेवासमेत सुरु गरेको उनको भनाइ छ ।

विस्तार गरिएका सेवा आम सेवाग्रहीले अस्पतालको तोकिएको समयबाहेक अतिरिक्त रकम तिरेर ईएचएस वार्डबाट पनि सेवा लिन सकिने जनाइएको छ । त्यस्तै बुधवारबाट मुखको सिटीस्क्यान सम्बन्धि सीसीवीसीटी तथा न्यूरो मेडिसिन सेवाको ईईजी सेवा पनि सञ्चालनमा आएको उनले बताए ।

प्रदेश बाहिर उपचार गर्न जान नपर्ने गरि लुम्बिनी प्रादेशिक अस्पतालको विकास गर्ने प्रदेश सरकारको योजना रहेको लुम्बिनी प्रदेश सरकारका स्वास्थ्य, जनसंख्या तथा परिवार कल्याण मन्त्री इन्द्रजित थारुले बताए । सरकारले ल्याएको योजनालाई कार्यान्वयन गर्नेतर्फ अस्पताल प्रशासनलाई मन्त्री थारुले निर्देशन समेत दिए । जनतालाई सर्वसुलभ, गुणस्तरीय सेवालाई प्राथमिकतामा राख्नुपर्नेमा उनको जोड छ ।

प्रदेशकै सबैभन्दा ठूलो अस्पताल भएकाले पनि आम सेवाग्राहीबाट ठूलो अपेक्षा रहेको भन्दै सेवा प्रवाहमा ध्यान दिनुपर्नेमा स्वास्थ्य जनसंख्या तथा परिवार कल्याण मन्त्रालयका सचिव विकास देवकोटा जोड दिन्छन् । अस्पताल विकास समितिको मोडेलमा चल्ने भएपनि त्यसमा सरकारबाट सेवा बिस्तार र सुदृढीकरणका लागि थप सेवा हुँदै आएको उनले बताए । प्रदेश सरकारले करिब ६ अर्ब बराबरको माष्टर प्लानअनुसार अस्पतालको पुर्वाधार विकास गरिरहेको छ । प्रदेश सरकारले कोभिडबाहेक १० प्रतिशतभन्दा बढी बजेट स्वस्थ्य क्षेत्रमा विनियोजन गरेको सचिव देवकोटाले बताए ।

सेवाग्रहीको माग र आवश्यकता अनुसार आईसियु, विशिष्टीकृत कार्डियो सेवा, क्याथ ल्याब समेतको सेवा विस्तारको योजना अस्पतालले बताएको छ ।

प्रदेशमै १ सय २० जना वरिष्ठ विशेषज्ञ चिकित्सक, विशेषज्ञ चिकित्सकहरु, २ सय ५० जना नर्सिङ स्टाफहरु र ७ सय कर्मचारीहरुले लुम्बिनी प्रादेशिक अस्पतालबाट सेवा दिदै आएका छन ।


क्याटेगोरी : लुम्बिनी प्रदेश, समाचार



तपाईको प्रतिक्रिया दिनुहोस


ट्रेण्डिङ