काठमाडौं—स्वास्थ्य तथा जनसंख्यामन्त्री विरोध खतिवडाले जापान सरकारबाट नेपालको स्वास्थ्य क्षेत्रमा निरन्तर बढ्दो सहयोगको अपेक्षा गरेको बताएका छन् । बिहीबार मन्त्रालयमा नेपालका लागि जापानी राजदूत किकुता युतासँगको शिष्टाचार भेटका क्रममा मन्त्री खतिवडाले उक्त धारणा व्यक्त गरेका हुन् ।
उनले जापानले नेपालमा विभिन्न स्वास्थ्य परियोजनामा सहयोग गरेको फेरिहस्ते प्रस्तुत गर्दै महाभूकम्पपछि स्वास्थ्य संरचना पुनःनिर्माण र कोभिड—१९ महामारीमा जापानले गरेको सहयोगको प्रशसा गरे । सो क्रममा उनले सन् १९५६ मा नेपाल र जापानबीच कुटनीतिक सम्बन्ध स्थापना भएदेखि नै उत्कृष्ट द्विपक्षीय सम्बन्ध रहेकोमा आभार समेत व्यक्त गरे ।
नेपालको पूर्वाधार विकास, गरिबी निवारण, कृषि, साना तथा मझौला उद्यम, जनस्वास्थ्य र शिक्षाको सुधार, मानव संशाधनको विकासलगायतका क्षेत्रमा जापान सरकारको निरन्तर सहयोग रहेको उल्लेख गर्दै मन्त्री खतिवडाले भूकम्पपछि वीर अस्पताल, परोपकार प्रसुती गृह, त्रिभुवन विश्वविद्यालय, शिक्षण अस्पताल, कान्ति बाल अस्पताल निर्माण, विस्तार र सुधारका लागि पु¥याएको योगदान उल्लेखनीय रहेको बताए । यस्तै, उनले विभिन्न स्वास्थ्य परियोजनाको रहेको जापानी सहयोग सरहाना गरे ।
सन् २०२२ को मध्य अप्रिलसम्ममा नेपालले सबै जनसंख्यालाई खोप लगाउने लक्ष्य राखेको उल्लेख गर्दै १६ लाख १४ हजार ७ सय ४० डोज अस्ट्राजेनेकाको खोप महत्वपूर्ण समयमा उपलब्ध गराएको भन्दैं धन्यवाद ज्ञापन गरे । यस्तै, कोभिड—१९ विरुद्धको लडाइमा नेपाललाई चिकित्सा उपकरण र आपूर्तिको महत्वपूर्ण सहयोगको पनि प्रशंशा गरे । जापानले कोभिड—१९ विरुद्ध लडाइमा नेपाललाई १ सय ६० वटा अक्सिजन जेनेरेटर, २५ वटा ब्लड ग्यास एनलाइजर, २५ वटा पोर्टेबल अल्ट्रासाउण्ड इमेज डाइग्नोष्टिक सिष्मट र ६ वटा एम्बुलेन्स उपलब्ध गराएको थियो ।
जापानले नेपाललगायत विश्वका सबै विकासशोन्मुख देशहरुमा कोभ्याक्समार्फत भ्याक्सिन उपलब्ध गराउन १ सय करोड अमेरिकी डलर उपलब्ध गराउने प्रतिवद्धता जनाएको छ । उक्त प्रतिवद्धताको पनि मन्त्री खतिवडाले प्रशंशा गरेका थिए ।
