वडाअध्यक्ष जिरेलले गरे मृगौला पीडितलाई सहयोग

दोलखा – बैतेश्वर गाउँपालिका वडा नं. ८ क्षेत्रपाका वडाअध्यक्ष शान्त बहादुर जिरेलको पहलमा मृगौला पीडित केदार श्रेष्ठलाई ५० हजार २ सय रुपैयाँ सहयोग गरेका छन् । बैतेश्वर–८ क्षेत्रपाको क्षेत्रवती माध्यमिक विद्यालयबाट २०६३ सालमा एसएलसी उतीर्ण गरेर व्यवसाय सञ्चालन गर्दै आएका व्यक्तिहरुले आर्थिक सहयोग गरेका हुन् ।

क्षेत्रपा घर भइ काठमाडौँ बस्दै आएका २८ वर्षीय मृगौला पीडित श्रेष्ठको आर्थिक अभावका कारण उपचारमा समस्या हुँदै आएको थियो । युवा उमेरमै मृगौलाले काम नगर्ने भएपछि उपचार गर्न समस्या भएकाले थप सहयोगको लागि सहयोगी दाताहरुसँग श्रेष्ठले अनुरोध समेत गरेका छन ।

वर्षौदेखि मृगौलाको उपचार गर्दै आएका श्रेष्ठको महँगो उपचार खर्चका कारण दैनिक गुजारा चलाउनै मुस्किल रहेको बताएका छन् । बैतेश्वर ८ का वडाअध्यक्ष जिरेलले मृगौला पीडित श्रेष्ठलाई काठमाडौँ डेरामानै पुगेर सहयोग रकम पीडितलाई हस्तान्तरण गरेका थिए ।