डा. भोला रिजाल
कुनै पनि चिकित्सकको जीवनमा अविस्मरणीय दशैंहरु थुप्रै आउने गर्छन् । त्यस्तै मेरो जीवनमा पनि त्यस्ता दशैंहरु धेरै पटक आए । कुरा वि.सं २०४८/४९ तिरको हुनुपर्छ । त्यसबेला ओम अस्पताल खोलेको भर्खरै मात्र २/३ वर्ष भएको थियो । त्यतिखेर ओम अस्पताल कमलपोखरीमा थियो ।
र, त्यसबेलाको दशैंमा टिकाको साइत करिब १० बजेतिरको थियो । तर, टिकाको साइतको समयतिर ओम अस्पतालमा एउटा बिरामी आयो भनेर खबर आयो । चिकित्सक भएको नाताले हामीले हाम्रो जिम्मेवारीलाई ब्यक्तिगत जीवनभन्दा पनि माथि नै राखेका हुन्छौ, राख्नु पनि पर्छ । त्यसैले म तुरुन्तै ओम अस्पताल आउनुपर्ने भयो । म आउने भएपछि मेरो आमा, बुवा र श्रीमती पनि मसँगै भ्याइएछ भने त्यतै टिका लगाउला भनेर मसँगै गाडीमा अस्पताल आउनुभयो । बिरामीको उपचार भएपछि हामी त्यसपछि हामी टिका थाप्न झम्सिखेलस्थित माइलो ठूलो बुवाकोमा गयौं । कहिलेकाहीँ परिवारका सबै आफन्तसँगै हुँदैनौं त, कहिले भएको बेला समयको अभाव खड्किने हुन्छ ।
यस्तै एक पटकको दशैंमा म लगायत मेरो सम्पूर्ण परिवार पुर्ख्याैली घर धनकुटा गएका थियौं । त्यसबेला पनि त्यहाँ पुगेर फर्कन लाग्दा पनि शिविर सञ्चालन भएकोले बिरामीको उपचार गर्नुपर्ने अवस्था आएको थियो र गरे पनि । यसरी हामी आफ्नो डियुटी र ब्यक्तिगत जीवनलाई अलग राख्नै सक्दैनौ । बरु ब्यक्तिगत जीवनभन्दा माथि चाहिँ आफ्नो जिम्मेवारीलाई राखिरहेका हुन्छौ । र, चिकित्सक भएको नाताले यो सब गर्न पनि पर्छ ।
यसपालिकै दशैंको कुरा गर्ने हो भने यो वर्ष पनि मेरो परिवारलाई दशैं लागेन । सदा झैं यस वर्ष घटस्थापनामा भने हामीले घरमा जमरा रोपेनौ । बरु रोप्यौं मनमा अर्काे वर्ष दशैं मनाउने आशा । यसैवर्ष मेरो कान्छो छोरालाई सन्तान लाभ भएकाले यता घरमा सुतक परिरहेको बेला भने यसै समय मेरो श्रीमतीकी काइलो दाइ बित्नुभयो । दशैंको टिकाकै दिन उहाँको १३ दिनको पुण्यतिथी परेको छ । एक घरमा दशैं शोकले ढाकिरहदा अर्कातर्फ उल्लासमय रुपमा दशैं मनाउन मनले नै मानेन त्यसैले यसपाली हामीले दशैं नमनाउने निधो गरेका छौं ।
यसरी हामी चिकित्सकको जीवनमा त्यस्ता अविस्मरणीय दशैं कयौं पटक आउँछन् । हामी चिकित्सकहरुको जीवनमा टिका कहिले जुर्ने त, कहिले नजुर्ने हुन्छ । सधैं सबैको निधारमा टिका, हातमा रमाइलो र साथमा परिवार हुन्छ भन्ने हुदैन । अझ हामी चिकित्सकको जीवनमा त, यस्तो अवस्था थुप्रै पटक आउँछन् । त्यसैले हामीले अर्काे पटक दशैं मनाउन आश र धैर्यता सदैव मनमा राख्नुपर्छ । हामी चिकित्सकको यी नै भोगाइलाई समेट्दै मैले “आत्मालाई साँची राखेर” गीत लेखेको थिए । जसमा स्वर गायिका सपना मल्ल र संगीतकार युगराज गुरुङ्गले दिनुभएको छ ।
