सुरक्षित र भयरहित रुपमा स्वास्थ्य सेवा प्रवाह गर्ने वातावरण बनाउन एनएमएको माग

काठमाडौं—नेपाल चिकित्सक संघ (एनएमए)ले सुरक्षित, भयरहित र शान्तिपूर्ण वातावरणमा स्वास्थ्य सेवा प्रवाह गर्ने वातावरण सिर्जना गर्न माग गरेको छ । मंगलबार जुम्लामा चिकित्सकमाथि भएको हातपात तथा कुटपिटको घटनाबारेमा जानकारी दिन आयोजित पत्रकार सम्मेलनमा स्वास्थ्यकर्मी तथा स्वास्थ्य संस्था सुरक्षा सम्बन्धी ऐनलाई कार्यन्वयन गर्न पनि संघले माग गरेको छ ।

संघका अध्यक्ष डा. लोचन कार्की र महासचिव डा. बद्री रिजालले जुम्लास्थित कर्णाली स्वास्थ्य विज्ञान प्रतिष्ठानका डा. करण शाहमाथि भएको हातपात र कुटपिटको घटनाबारे जानकारी दिन जारी गरेको विज्ञप्तिमा पनि उक्त कुरा उल्लेख छ । संघले कर्णाली प्रतिष्ठानका चिकित्सक डा. शाहमाथि प्रतिष्ठानकै कर्मचारी हातपात तथा कुटपिट गरेपछि पीडकलाई थुनामा राख्न दबाब सिर्जना गरेको जनाइएको छ ।

उक्त दबाबस्वरुप नै कुटपिटको घटनामा संलग्न व्यक्तिलाई थुनामा राखेर अनुसन्धान जारी रहेको बताउँदैं संघले उक्त केसलाई अदालतमा पेश गर्न सम्बन्धित पक्षलाई दबाब सिर्जना ३ सदस्सीय टोली जुम्ला पठाएको जनाएको छ । एनएमएले विज्ञप्तिमा स्वास्थ्यकर्मी तथा स्वास्थ्य संस्थाको सुरक्षाको सम्बन्धमा सरकारसँग आवश्यक प्रबन्धको अपेक्षा गरेको उल्लेख छ ।

एनएमएले कुटपिट र हातपातबाट घाइते भएका डा. शाहलाई थप उपचारका लागि काठमाडौं ल्याएको जानकारी दिएको छ ।