काठमाडौं–मलेसियाका चिकित्सकले काट्नुपर्छ भनिएको एक नेपाली युवकको हात नेपालका चिकित्सकले जोगाइदिएका छन् । मलेसियाको प्लास्ट्रिक फ्याट्रीमा काम गर्न गएका दाङका २४ वर्षीया मनोज चौधरीको ९ दिन अघि मेसिनमा परी हात पिसिएको थियो ।
मेसिनमा परी हत्केलाभन्दा माथिको भाग फुटेर छियाँछियाँ परेको थियो । हात मेसिनमा पर्नसाथ मलेसियाको अस्पताल पुगेका उनलाई त्यहाँका चिकित्सकले हात काट्नुपर्ने अन्तिम विकल्प सुनाएका थिए ।
तत्कालै नेपाल आएका उनको हात भक्तपुरस्थित डा. इवामुरा मेमोरियल अस्पतालका चिकित्सकहरुले जोगाइदिएका हुन् । आफूले हात काट्न नमानेको र काट्नै परे नेपालमा नै गएर काट्छु भनेर फर्केर आएको मनोजले बताए । ‘हात मेसिनमा परेर पिसिएपछि तत्काल त्यहीको अस्पतालमा गएको थिए,’ उनले भने, ‘हात काट्नुपर्छ भनेर चिकित्सकले भनेपछि काट्नु परेपनि नेपालमा नै गएर काट्छु भनेर आए । तर, यहाँ काट्नुपरेन ।’
हात जोगिएकोमा उनले चिकित्सक, नर्स तथा अस्पताललाई धन्यवाद दिएका छन् । चौधरीको हाडजोर्नी सर्जन डा. निरजविक्रम शाहको टोलीले शल्यक्रिया गरेको हो । डा. शाहको टोलीलाई हात सर्जन डा. नरेश श्रेष्ठले सहयोग गरेका थिए ।
शल्यक्रियामा संलग्न डा शाहका अनुसार चौधरीको हातको स्वास्थ्य अवस्था धेरै सुधार भएको छ । ‘उहाँको हात मेसिनमा परेको चार दिनपछि मात्र आइपुग्नुभएको थियो । अवस्था निकै डरलाग्दो थियो,’ डा. शाहले भने, ‘हामीले चाँडो शल्यक्रिया ग¥यौं । धन्न इन्फेक्सन भएन ।’
चौधरीको स्वास्थ्य अवस्था सुधार भएको हुँदा शुक्रबार नै डिस्चार्ज गर्ने तयारी रहेको चिकित्सकले जानकारी दिए ।
अस्पतालले हाडजोर्नी सम्बन्धी सुपरस्पेसालिटी सेवा सुरु गरेको अस्पताल संचालक समितिका अध्यक्ष डा. मोहनमान श्रेष्ठले बताए । ‘हामीले भक्तपुरमा नै पहिलोपटक हाडजोर्नीको राम्रो टिम तयार गरी सुपरस्पेसालिटी सेवा दिन सुरु गरेका छौं । जुन भक्तपुरका अस्पतालहरुमा पहिलो हामी हौं,’ उनले भने। ‘अब बिस्तारै अन्य विधाको पनि यहि किसिमको सेवा दिने तयारीमा छौं ।’
