मुख्यमन्त्रीका रुपमा हेरिएका खगराज कास्कीबाट प्रदेश सभामा विजयी

पोखरा—एमालेबाट गण्डकी प्रदेशको भावि मुख्यमन्त्रीको दाबेदारका रुपमा हेरिएका पूर्व स्वास्थ्यमन्त्री खगराज अधिकारी कास्कीबाट विजयी भएका छन् । शुक्रबार प्राप्त अन्तिम मत परिणामअनुसार उनले कास्की १ (१)बाट गण्डकी प्रदेशसभा सदस्यमा विजय हासिल गरेका हु्न ।

गण्डकीका एमालेका प्रभावशाली नेता समेत रहिसकेका अधिकारीले १५ हजार ५ सय २३ मत ल्याए । उनको प्रतिद्वन्द्वी सत्ता गठबन्धनका उम्मेदवार दीपक कोइरालाले ११ हजार ६ सय २७ मत प्राप्त गरे । खगराजले ३ हजार ९ सय ९६ मतले माओवादी केन्द्रका नेता कोइरालालाई पराजित गरेका हुन् ।

यसअघि गृहमन्त्री समेत भइसकेका खगराज एमाले संगठन विभाग प्रमुख समेत हुन् । उनी मुख्यमन्त्रीमै दावी गर्ने उद्देश्यका साथ प्रदेश सभामा उम्मेदवार बनेका थिए ।

गण्डकी प्रदेशमा ३६ प्रदेशसभा निर्वाचन क्षेत्र रहेका छन् ।