काठमाडौ–नेपालको चिकित्सा शिक्षाको क्षेत्रमा देखिएको विवादका कारण आशा लाग्दा विद्यार्थी यस वर्ष एमबिबिएस अध्ययन गर्न विदेशिएका छन् । एक हप्ताको अवधिमा करिब एक सय विद्यार्थीले नेपाल मेडिकल काउन्सिलबाट स्वीकृती लिएका छन् ।
काउन्सिलका सदस्य डा. कालुसिंह खत्रीकाअनुसार विदेश जानेहरुमा त्रिभुवन विश्वविश्वविद्यालय चिकित्साशास्त्र अध्ययन संस्थान (आईओएम) ले लिएको प्रवेश परीक्षमा बरियताक्रममा एक सय भन्दा अगाडि नै परेका पनि एमबीबीएस अध्ययनका लागि विदेशिएको बताए । उनका अनुसार हाल दैनिक २० देखि २५ जनाको संख्यामा विद्यार्थीहरुले काउन्सिलबाट स्वीकृत लिन थालेका छन् ।
गत असोज ३ गते आइओएमले एमबिबिएस अध्ययनका लागि प्रवेश परिक्षा लिएको थियो । सो परीक्षाको नतिजा ६ गते सार्वजनिक गरिए पनि हाल सम्म काउन्सिलिङ्को मिति तय भएको छैन । काउन्सिलिङ अन्यौल भएपनि विद्यार्थीहरु विदेशिन थालेका छन् ।
आइओएममा ९ हजार विद्यार्थी सहभागी भएकोमा ४ हजार ३ सय पास भएका थिए । नतिजा सार्वजनिक भएको २४ दिनमा पनि काउन्सिलिङ्को टुङ्गो लागेको छैन । काउन्सिलिङ नहुदा मेडिकल काउन्सिलले मेडिकल कलेजहरुको सिट निर्धारण गर्न सकेको छैन ।
आइओएमका डिन प्रा.डा. जगदिश प्रसाद अग्रवाल चाडै काउन्सिलिङको मिति तय हुने बताउँछन । ‘७५ प्रतिशत छात्रवृद्धि दिने निर्णयको चिट्टठी आइओएममा चिकित्सा शिक्षा आयोगले पठाएको थिएन । अब पत्र पाएका छौं केही दिनमा मिति तय गछौ,’ अग्रवालले भने ।
