काठमाडौं—नेपाल राष्ट्र बैंकको पहिलो गभर्नर हिमालय समशेर जबराको ९५ वर्षको उमेरमा निधन भएको छ । विगत ५ वर्षदेखि पार्किन्सन्सको समस्याबाट पीडित उनको आइतबार बिहान निधन भएको हो ।
उनको केही साताअघिदेखि काठमाडौंको थापाथलीस्थित नर्भिक इन्टरनेशनल हस्पिटलमा उपचार जारी राखिएको अस्पतालले जनाएको थियो । उपचारकै क्रममा उनको निधन भएको हो ।
जबरा सन् १९२८ मा स्वस्थानी पूर्णिमाका दिन जन्मिएको थियो ।
‘आज स्वस्थानी पूर्णिमाकै दिन बुवाको निधन भएको छ’, छोरी संगीता थापाले आफ्नो फेसबुक पेजमा लेखेकी छन् ।
स्वर्गीय राणा नेपाल सरकारको सचिव हुँदै नेपाल राष्ट्र बैंकको पहिलो गभर्नर बनेका थिए । राजा महेन्द्रले राष्ट्र बैकको स्थापना गरेर गभर्नरको नियुक्त हुँदा उनको उमेर मात्र २९ वर्ष थियो । उनी हिमालयन बैंकको संस्थापक पनि हुन् ।
उनले ९५ वर्षको उमेरमा समेत २ वटा किताब प्रकाशनको तयारी गरिरहेका थिए । स्वर्गीय राणाका २ छोरा र २ छोरी छन् ।
