चितवन मेडिकल कलेजमा भएको घटनाका दोषीलाई कारवाही गर्न नेपाल नर्सिङ संघको माग

काठमाडौं—चितवन मेडिकल कलेजमा आइतबार भएको तोडफोडको घटनाप्रति नेपाल नर्सिङ संघले गम्भीर ध्यानाकर्षण भएको जनाएको छ । मंगलबार संघकी अध्यक्ष तारा पोखरेल र महासचिव लक्ष्मी केसीले संयुक्त रुपमा विज्ञप्ति जारी गर्दै गम्भीर ध्यानाकर्षण भएको जनाएका छन् ।

‘स्वास्थ्य संस्थाजस्तो अति संवेदनशील क्षेत्रमा स्वास्थ्यकर्मीमाथि हातपात गर्ने अराजक गतिविधीको यस संघ घोर भत्र्सना गर्दछ,’ विज्ञप्तिमा भनिएको छ । संघले विरामीको मृत्यु पश्चात सत्यतथ्य नबुझी स्वास्थ्यकर्मीको लापरवाही भनेर अस्पताल क्षेत्रभित्र उच्छृखल कार्य भएको भन्दैं त्यसको निन्दा समेत गरेको छ ।

संघले घटनाको निष्पक्ष छानविन गर्दै दोषीमाथि कारवाही गर्न समेत माग गरेको छ । उसले अस्पतालजस्तो संवेदनशील क्षेत्रमा बारम्बार हुने यस्ता घटनामाथि सम्बन्धित निकायले उचित छानविन गरी दोषीमाथि कडाभन्दा कडा कारवाही गर्न भनेको छ । साथै, संघले सुरक्षित कार्यक्षेत्रको प्रत्याभूति दिलाउँदैं घटना दोहोरिन नदिन समेत माग गरेको छ ।